చిరుత కళేబరం లభ్యం

నల్గొండ గ్రామీణం, న్యూస్‌టుడే: నల్గొండ సమీపంలోని మున్సిపాలిటీ డంపింగ్‌ యార్డు ప్రాంతం చెట్ల పొదల్లో చిరుత కళేబరం కనిపించింది. ఇది పది రోజుల క్రితం మృతి చెంది ఉండవచ్చని తెలుస్తోంది. స్థానికులు చూసి అటవీశాఖ అధికారులకు సమాచారం ఇచ్చారు. నల్గొండ, తిప్పర్తి పరిసరాల్లోని ఖాజీరామారం, కేశరాజుపల్లి గ్రామాల్లో 10 రోజుల క్రితం చిరుత ఆనవాళ్లు ఉన్నట్లు గ్రామస్థులు ఆందోళన చెందుతున్నారు. అడవి పందులు పొలాలను నాశనం చేస్తున్నాయని రైతులు విషపు గుళికలు పెట్టారు. అవి తిన్న రెండు పందులు చనిపోయాయి. చనిపోయిన పందిని చిరుత తిన్నట్లు అటవీ అధికారులు భావిస్తున్నారు. దీంతో పులి చనిపోయిందని డీఎఫ్‌వో రాంబాబు తెలిపారు. మరో చిరుత కూడా ఉండవచ్చని గ్రామస్థులు ఆందోళన వ్యక్తం చేస్తున్నారు. చిరుత రాచకొండ ప్రాంతం నుంచి నల్గొండకు వచ్చి ఉండవచ్చని జిల్లా అటవీశాఖ అధికారి తెలిపారు. చనిపోయిన చిరుత కళేబరాన్ని పోస్టుమార్టం కోసం హైదరాబాద్‌కు పంపినట్లు అధికారులు తెలిపారు.