దంపతుల హత్య

మంజులత మృతదేహం,  విగతజీవిగా లక్ష్మీధర ఆపాట్‌

కటక్‌, న్యూస్‌టుడే: కేంఝర్‌ జిల్లా బలని పోలీస్‌ స్టేషన్‌ పరిధిలోని లకర్ధ గ్రామంలో సోమవారం రాత్రి గుర్తుతెలియని దుండగులు దంపతులను తుపాకులతో కాల్చి చంపారు. పోలీసులు అందించిన వివరాల ప్రకారం... లక్ష్మీధర ఆపాట్‌ (40)కు గ్రామంలో కిరాణా దుకాణం ఉంది. సోమవారం రాత్రి కొందరు దుండగులు సరకులు కొనుగోలు చేయడానికి వచ్చి లక్ష్మీధరతో గొడవపడ్డారు. తర్వాత లక్ష్మీధర్‌, ఆయన భార్య మంజులత (35)పై కాల్పులు జరిపి పరారయ్యారు. కాల్పుల శబ్దం విని గ్రామస్థులు దుకాణం వద్దకు వెళ్లి గాయాలతో పడి ఉన్న దంపతులను వెంటనే ఆసుపత్రికి తరలించగా వైద్యులు పరీక్షించి మృతి చెందినట్లు ప్రకటించారు. సమాచారం అందుకొన్న పోలీసులు దర్యాప్తు ప్రారంభించారు. లక్ష్మీధరకు గుండెలోకి, మంజులత పొట్టలోకి బుల్లెట్లు దూసుకుపోయాయి. మంగళవారం శవాల పంచనామా జరిపి గ్రామానికి తీసుకొచ్చారు. దీంతో గ్రామంలో విషాదం నెలకొంది. ఈ దంపతులకు పదేళ్ల కుమారుడు ఉన్నాడు.