దోర్నాల దారిలో కన్నడిగుల సందడి

నేటి నుంచి రాత్రి వేళా వాహనాలకు అనుమతి

శ్రీశైలం దారిలో బారులు తీరిన వాహనాలు

పెద్దదోర్నాల, న్యూస్‌టుడే: ద్వాదశ జ్యోతిర్లింగాలలో ఒకటైన శ్రీశైలంలో ఈ నెల 19 నుండి 23 వరకు నిర్వహించనున్న ఉగాది బ్రహ్మోత్సవాలను తిలకించేందుకు వేలాది మంది భక్తులు తరలివస్తున్నారు. ముఖ్యంగా క్షేత్రంలో వెలసిన భ్రమరాంబికా దేవిని కర్ణాటక వాసులు తమ ఇంటి ఆడపడుచుగా కొలుస్తారు. ఆ క్రమంలోనే ఉగాది వేడుకల్లో అమ్మవారికి సారె సమర్పించడం సంప్రదాయంగా వస్తోంది. అందులో భాగంగా వారంతా ప్రత్యేక వాహనాలు, కాలినడకన క్షేత్రానికి చేరుకుంటున్నారు. పాదయాత్రగా వచ్చేవారు నంద్యాల జిల్లా వెంకటాపురం నుంచి నల్లమల అటవీ ప్రాంతం లోంచి; వాహనాల్లో వచ్చేవారు దోర్నాల మీదుగా వెళ్తున్నారు. వాహనాలకు రాత్రి వేళ అనుమతి లేకపోవడంతో... శుక్రవారం రాత్రి నుంచి శనివారం ఉదయం ఆరు గంటల వరకు వందలాది వాహనాలు నిలిచిపోయాయి.

వన్యప్రాణులకు హాని తలపెట్టొద్దు...: పెద్దదోర్నాల - శ్రీశైలం ఘాట్ రహదారిలో ఆదివారం నుంచి బ్రహ్మోత్సవాలు ముగిసే వరకు రాత్రి వేళల్లోనూ వాహనాల రాకపోకలకు అనుమతి ఇస్తున్నట్లు దోర్నాల అటవీ క్షేత్రాధికారి విశ్వేశ్వరరావు తెలిపారు. వన్యప్రాణుల సంరక్షణలో భాగంగా రాత్రి తొమ్మిది నుంచి ఉదయం ఆరు గంటల వరకు ఈ మార్గంలో వాహనాల రాకపోకలపై నిషేధం ఉంది. ఉత్సవాలకు వెళ్లే భక్తులకు ఇబ్బంది లేకుండా ఈ వెసులుబాటు కల్పిస్తున్నామని... వన్యప్రాణులకు హాని లేకుండా చోదకులు తమ వాహనాలు నడపాలని ఆయన కోరారు.