సూర్యప్రభ వాహనంపై చంద్రశేఖరుడి వైభవం

ఊరేగుతున్న చంద్రశేఖర స్వామివారు

తిరువణ్ణామలై, న్యూస్‌టుడే: అరుణాచలేశ్వరస్వామి ఆలయంలో కార్తిక మహా దీపోత్సవం 2వ రోజైన సోమవారం ఉదయం ఉన్నాములై సమేత చంద్రశేఖరస్వామిని సూర్యప్రభ వాహనంపై కనులపండువగా ఊరేగించారు. ముందుగా ఆలయంలో మూలవరులైన చంద్రశేఖరస్వామి, విఘ్నేశ్వరస్వామిలకు ప్రత్యేక అభిషేకాలు, అలంకరణ, పూజలు, దీపారాధనలు జరిగాయి. తర్వాత మూషిక వాహనంపై గణపతిని ఊరేగించారు. తర్వాత ఉన్నాములై సమేత చంద్రశేఖరస్వామిని సూర్యప్రభ వాహనంపై కొలువుదీర్చారు. ఊరేగింపును వైభవంగా నిర్వహించారు. ముందుగా ఉత్సవం తొలిరోజైన ఆదివారం రాత్రి పంచమూర్తులైన విఘ్నేశ్వరస్వామిని మూషిక, ఉన్నాములై సమేత చంద్రశేఖరస్వామిని వెండి అధికార నంది, పరాశక్తి అమ్మవారిని హంస, చండికేశ్వరర్‌ను కర్ర నంది వాహనంపై ఆలయ మాడ వీధుల్లో ఊరేగించారు. ఈ కార్యక్రమాలలో భక్తులు పెద్ద సంఖ్యలో పాల్గొన్నారు.

పంచమూర్తుల ఊరేగింపు దృశ్యం