కుమార్తెను విక్రయించేందుకు తల్లిదండ్రుల యత్నం

రక్షించిన పోలీసులు

ఆర్కేనగర్‌, న్యూస్‌టుడే: తల్లిదండ్రులే తమ కుమార్తెను విక్రయించేందుకు యత్నించిన సంఘటన ఘటన చెన్నైలో చోటుచేసుకుంది. పోలీసుల కథనం మేరకు... చెన్నై తాంబరం పడప్పైలోని కరసంగల్‌ గ్రామానికి చెందిన ఏడో తరగతి గిరిజన బాలిక (17)ను చదువు మానేయాలని తల్లిదండ్రులు చెప్పారు. తాను చదువుతానని, పాఠశాలకు పంపాలని తల్లిదండ్రులను కోరినా పట్టించుకోలేదు. ఈ నేపథ్యంలో తల్లిదండ్రులు కుమార్తెను ఆంధ్రప్రదేశ్‌కు చెందిన ఓ వ్యక్తికి రూ.1.50 లక్షలకు విక్రయించేందుకు నిర్ణయించారు. అతనితో మాట్లాడేందుకు శుక్రవారం వెళ్తూ ఇంట్లో ఓ గదిలో బంధించారు. విషయాన్ని బాలిక సెల్‌ఫోన్‌ ద్వారా పోలీస్‌ కంట్రోల్‌ రూంకు తెలియజేసింది. తాంబరం పోలీస్‌ కమిషనర్‌ కార్యాలయం నుంచి మణిమంగలం పోలీసులకు సమాచారం అందడంతో వెంటనే పోలీసులు, బాలల భద్రతాధికారులు బాలిక ఇంటికి వెళ్లి విచారించారు. తల్లిదండ్రులతో ఉండడం ఇష్టం లేదని తెలుసుకున్న పోలీసులు బాలికను కాంచీపురం హోంకు తరలించారు. బాలికను కొనుగోలు చేయాలనుకున్న వ్యక్తి వివరాల కోసం దర్యాప్తు జరుపుతున్నారు.