చేర్యాల.. 1962 కంటే ముందు జనగామతో కలిసి ‘సమితి’ కేంద్రంగా వెలుగొందింది. సమితి వ్యవస్థ రద్దయిన తర్వాత నియోజకవర్గ కేంద్రంగానూ 47 ఏళ్ల పాటు కొనసాగింది. అంతేకాకుండా పదేళ పాటు టౌన్‌ మున్సిపాలిటీగానూ సాగింది. ఆ తర్వాత నిబంధనల మేర మేజర్‌ పంచాయతీగా మారిపోయింది. దీనికి తోడు 2009లో నియోజకవర్గాల పునర్విభజనలో భాగంగా జనగామ నియోజకవర్గంలో విలీనమైంది. ఇక అక్కడి నుంచి మండల కేంద్రంగానే మిగిలిపోయింది. తిరిగి స్వరాష్ట్రం వచ్చాక మున్సిపాలిటీ హోదాను దక్కించుకుంది. కాగా ఈ ప్రాంతం జిల్లా పరంగా సిద్దిపేటలో ఉండగా.. శాసనసభ నియోజకవర్గం జనగామ కిందకు వస్తుంది. అదే పార్లమెంటరీ నియోజకవర్గం భువనగిరి పరిధిలో ఉంటుంది. రెవెన్యూ డివిజన్‌ సిద్దిపేట కాగా, పోలీసు, విద్యుత్తుశాఖ డివిజన్‌ కార్యాలయం హుస్నాబాద్‌కు, ఇంజినీరింగ్‌ కార్యాలయం గజ్వేల్‌కు కేటాయించారు. ఇలా చేర్యాల మూడు దిక్కులకు కేటాయించడం గమనార్హం.