24,25 తేదీల్లో భారీ వర్షాలు

హైదరాబాద్‌: ఆగ్నేయ బంగాళాఖాతంలో ఏర్పడిన ఉపరితల ఆవర్తన ప్రభావంతో దక్షిణ మధ్య బంగాళాఖాతంలో శనివారం అల్పపీడనం ఏర్పడింది. ఇది రాగల 48 గంటల్లో నైరుతి బంగాళాఖాతంలో వాయుగుండంగా బలపడే అవకాశం ఉందని వాతావరణ కేంద్రం (ఐఎండీ) వెల్లడించింది. ఇది క్రమంగా పశ్చిమ వాయువ్య దిశ వైపు కదులుతూ దక్షిణ తమిళనాడు తీరం వైపుగా ప్రయాణించి ఈ నెల 25న తమిళనాడు-పుదుచ్చేరి తీర ప్రాంతానికి చేరనుందని ఐఎండీ తెలిపింది. అల్పపీడనం ప్రభావంతో ఈ నెల 24, 25 తేదీల్లో దక్షిణ కోస్తా, రాయలసీమల్లో అక్కడక్కడా భారీ వర్షాలు పడే సూచనలున్నాయని, దక్షిణ కోస్తా తీరం వెంబడి గంటకు 55 నుంచి గరిష్టంగా 75 కి.మీ. వేగంతో గాలులు వీస్తాయని ఐఎండీ అధికారులు తెలిపారు. ఇటీవలే రెండు తెలుగు రాష్ట్రాల్లో కురిసిన భారీ వర్షాలకు తీవ్ర నష్టం చేకూరిన సంగతి తెలిసిందే.