వారిని అనుసరిస్తే 9/11 విధ్వంసం జరిగేది కాదు

ఇంటర్నెట్‌ డెస్క్‌: సకల మానవాళి నేర్చుకోవడానికి ఎన్నో పాఠాలు కలిగిన గొప్ప వ్యక్తులు ఆచార్య వినోబాభావే, స్వామి వివేకానంద అని ప్రధాని నరేంద్ర మోదీ అన్నారు. వినోబాభావే జయంతి సహా వివేకానందుడు అమెరికాలోని చికాగోలో 1893వ సంవత్సరంలో ఇదే రోజు ప్రసంగించిన సందర్భాన్ని పురస్కరించుకొని వారి గురించి మోదీ ట్విటర్‌లో ట్వీట్‌ చేశారు.

2001లో ఇదే రోజు అమెరికాలోని డబ్ల్యూటీవో టవర్స్‌పై ఉగ్రదాడిని ప్రస్తావించిన మోదీ.. వినోబా భావే ‘జై జగత్‌’ నినాదం, వివేకానందుడు ప్రవచించిన విశ్వమానవ సౌభ్రాతృత్వం అనే మార్గంలో పయనిస్తే ఆనాటి విధ్వంసం జరిగి ఉండేది కాదని అన్నారు. జాతిపిత మహాత్మాగాంధీ కూడా వినోబాభావేను ఎంతో గొప్పగా ప్రశంసించారన్న ప్రధాని యువత వివేకానందుడి చికాగో ప్రసంగాన్ని చదవాలని సూచించారు.