Dubai: వామ్మో..! కారు నంబరు ప్లేట్‌ అక్షరాల రూ.70 కోట్లు...

ఇంటర్నెట్‌ డెస్క్‌: ఈ మధ్య కాలంలో వాహనాల నంబరు ప్లేట్లపై ఆసక్తి పెరుగుతోంది. కొందరికి ఫ్యాన్సీ నంబర్లపై మక్కువ ఎక్కువ. అందుకోసం ఎంత  ఖర్చు చేసేందుకైనా వెనకాడట్లేదు. అందులోనూ సింగిల్‌ డిజిట్‌ నంబర్‌ అయితే ఇక చెప్పేపని లేదు. సినీ ప్రముఖులు, బడా వ్యాపారవేత్తలు, రాజకీయనాయకులు తమకు నచ్చిన నంబర్‌ ప్లేట్ల కోసం ఎక్కువగా వేలంలో పాల్గొంటారు. ఇటీవల చండీగఢ్‌లో ఓ వ్యక్తి తన రూ.71వేల స్కూటీ కోసం రూ.15 లక్షలు పెట్టి  మరీ ఫ్యాన్సీ నంబర్‌ను సొంతం చేసుకున్నాడు. ఇది సోషల్‌ మీడియాలో ఎంతగానో వైరలైంది. ఇప్పుడు తాజాగా దుబాయ్‌కి చెందిన ఓ వ్యక్తి తన కారు కోసం ఏకంగా  35 మిలియన్ల దిర్హమ్‌లు (రూ.70 కోట్లుకు పైగానే) ఖర్చుపెట్టి అందరినీ ఆశ్చర్యపరిచాడు. ఓ ఛారీటీ సంస్థ నిర్వహించిన వేలంలో పాల్గొన్న అతడు ‘AA8’ అనే సింగిల్‌ డిజిట్‌ నంబర్‌ కోసం అంత మొత్తం ఖర్చు చేశాడు. ఇది ప్రపంచంలోనే అత్యంత ఖరీదైన నంబర్ ప్లేట్‌లలో మూడో స్థానంలో నిలిచింది. గత ఏడాది ఇదే ఛారిటీ సంస్థ నిర్వహించిన వేలంలో ‘AA9’ అనే నెంబర్‌ ప్లేట్‌ రూ.79 కోట్లకు పలికి రికార్డు సృష్టించింది. 50 దేశాల్లోని పేద ప్రజల ఆకలి తీర్చేందుకు ‘1 బిలియన్‌ మీల్స్‌’ ప్రచారానికి మద్దతుగా ‘మోస్ట్‌ నోబల్‌ నంబర్స్‌’ అనే ఛారిటీ సంస్థ ఈ వేలంలో రూ.110 కోట్లను సమీకరించింది.