ఏనుగుల గుంపు బీభత్సం

వి.కోట: చిత్తూరు జిల్లా వి.కోట మండలంలో ఏనుగులు స్థానికులకు కంటి మీద కునుకు లేకుండా చేస్తున్నాయి. వెంకటేపల్లి, కుమ్మరమడుగు, దానమయ్యగారిపల్లె, పచ్చారు మేకలపల్లెలో పంట పొలాలను ఏనుగులు ధ్వంసం చేశాయి. గుంపుగా వచ్చిన ఏనుగులు రాత్రంతా పంటపొలాలపై పడి నాశనం చేశాయి. కోళ్లఫారాలను కూలదోశాయి. కోతకు వచ్చిన అరటి, బీన్స్ పంటలను ఏనుగులు నాశనం చేశాయని రైతులు వాపోతున్నారు. గుంపు నుంచి వేరుపడిన ఓ ఏనుగు ఉదయం పొలాల్లోనే ఉండటంతో దాన్ని తరిమేందుకు రైతులు పెద్దఎత్తున తరలివచ్చారు. బాణసంచా కాల్చుతూ, డప్పులు వాయిస్తూ ఏనుగును అడవిలోకి తరిమేందుకు ప్రయత్నించారు.