Andhra news: కోనసీమలో అదుపులోకి రాని మంటలు.. పైప్‌లైన్‌ కారణం కాదన్న ఓఎన్జీసీ

రాజోలు: కోనసీమ జిల్లాలోని శివకోటి ఆక్వా చెరువు వద్ద బోరుబావి నుంచి గ్యాస్‌, అగ్నికీలలు ఎగసిపడటానికి గ్యాస్‌ పైప్‌లైన్‌ కారణం కాదని, అక్కడ అసలు పైప్‌లైనే లేదని ఓఎన్జీసీ సిబ్బంది తేల్చారు. భూమి పొరల్లో గ్యాస్‌, నీరు ద్వారానే మంటలొచ్చాని చెప్పారు. బోరును మరింత లోతుకు తవ్వడం వల్లే అగ్నికీలలు ఎగసిపడ్డాయని పేర్కొన్నారు. నరసాపురం నుంచి ప్రత్యేక బృందం వస్తోందని, వారు వచ్చాకే మంటల్ని అదుపు చేయడం సాధ్యపడుతుందని అన్నారు. అయితే, బోరుబావి సమీపంలోనే ఓఎన్జీసీ పైపులైన్‌ ఉందని స్థానికులు చెబుతున్నారు. ఘటనాస్థలిని రెవెన్యూ, పోలీసులు, అగ్నిమాపక సిబ్బంది పరిశీలిస్తున్నారు. 

ఇవాళ ఉదయం రాజోలు మండలం శివకోటిలోని ఓ ఆక్వా చెరువు వద్ద బోరులోంచి గ్యాస్‌, అగ్నికీలలు ఎగసిపడటం కలకలం రేపిన సంగతి తెలిసిందే. అగ్నికీలలు, గ్యాస్‌ ఎగసిపడుతుండటంతో.. స్థానికులు భయాందోళనకు గురవుతున్నారు. 20 అడుగుల మేర ఈ మంటలు ఎగసిపడుతున్నాయి. సమాచారం అందుకున్న ఓఎన్జీసీ రంగంలోకి దిగింది. మంటలార్పేందుకు అగ్నిమాపక, ఓఎన్జీసీ సిబ్బంది తీవ్రంగా శ్రమిస్తున్నారు. ఇప్పటి వరకు మంటలు అదుపులోకి రాలేదు.