కొవిడ్‌-19కు మరో ఔషధం

జంతువులపై ప్రయోగం విజయవంతం
నైపర్‌ సంస్థ ప్రకటన

హైదరాబాద్‌: కొవిడ్‌-19 చికిత్సకు హైదరాబాద్‌లోని నేషనల్‌ ఇన్‌స్టిట్యూట్‌ ఆఫ్‌ ఫార్మాసూటికల్‌ ఎడ్యుకేషన్‌ అండ్‌ రీసెర్చ్‌ (నైపర్‌) సంస్థ నెబులైజర్‌ ఆధారిత మందును తయారుచేసింది. లైఫ్‌ యాక్టివస్‌, సుప్రీం ఇండస్ట్రీస్‌తో కలిసి సంయుక్తంగా లైఫ్‌ వైరోట్రీట్‌ అనే ఈ ఔషధాన్ని తయారు చేసినట్లు నైపర్‌ డైరెక్టర్‌ డాక్టర్‌ శశిబాలాసింగ్‌ ప్రకటించారు. లైఫ్‌ యాక్టివస్‌ ఎండీ డాక్టర్‌ కేశవ్‌ డియో, సుప్రీం ఇండస్ట్రీస్‌ డైరెక్టర్‌ డాక్టర్‌ పంచసర, నైపర్‌ డీన్‌ డాక్టర్‌ శ్రీనివాస్‌తో కలిసి ఆమె విలేకరులతో మాట్లాడారు. ఈ మందును గత నాలుగు నెలల్లో వివిధ రకాల జంతువులపై ప్రయోగించగా విజయవంతంగా పనిచేస్తోందని తెలిపారు. క్లినికల్‌ ట్రయల్స్‌, మందు తయారీకి సంబంధించి ఇప్పటికే డ్రగ్‌ కంట్రోలర్‌ జనరల్‌ ఆఫ్‌ ఇండియా (డీసీజీఐ) ఆమోదం లభించిందన్నారు. క్లినికల్‌ ట్రయల్స్‌ విజయవంతమైతే ఈ ఔషధాన్ని కొవిడ్‌-19 వైరస్‌ సోకిన వారితో పాటు ముందస్తుగా కూడా వినియోగించుకునే వీలుంటుందని చెప్పారు.

‘రక్తంలో ఆక్సిజన్‌ను పెంచుతుంది’
ఫ్లూ, శ్వాసకోశ వైరల్‌ ఇన్‌ఫెక్షన్లపై ఈ మందు పనిచేస్తుందని శశిబాలాసింగ్‌ పేర్కొన్నారు. రక్తంలో ఆక్సిజన్‌ శాతాన్ని పెంచేందుకు బాగా ఉపకరిస్తుందన్నారు.