తథాస్తు దేవతలు ఉంటారా? పెద్దల ఆశయం నిజమేనా?

తథాస్తు దేవతలు ఉన్నారో లేరో మనకు తెలియదు. మనం అన్ని సందర్భాల్లో మంచి మాటలే పలకాలనీ, మంచి సంకల్పాలే చేయాలనేది మన పూర్వీకుల, పెద్దల ఆశయం.  ప్రతికూలమైన మాటల వల్ల ఎలాంటి ఉపయోగం ఉండకపోగా కొన్నిసార్లు మనకో, ఇతరులకో కష్టమో నష్టమో కలగవచ్చు కూడా. ఇవన్నీ ఆలోచించి, సర్వకాల సర్వావస్థల్లోనూ మన భావాలు పవిత్రంగా, మన మాటలు సంస్కారవంతంగా ఉండాలని గుర్తుంచుకోవడానికే  మన పెద్దలు తథాస్తు దేవతలపేర్లు చెబుతుంటారు.

కుంకుమ చేయిజారి  పడి పోవడం అశుభానికి సంకేతమా?

ఎప్పుడైనా కుంకుమ చేయిజారి కిందపడితే అది అపశకునం అనుకోవడం ఒక మానసిక బలహీనత మాత్రమే. భూదేవికి బొట్టు పెట్టామని భావిస్తే సరిపోతుంది. నిజానికి దేవాలయాల్లో మెట్ల పూజలు చేస్తుంటారు భక్తులు. ఆ సందర్భంలో అందరూ నడిచే మెట్లదారి మీదే పసుపు - కుంకుమను పెట్టడం చూస్తుంటాం. అందువల్ల కుంకుమ కింద పడినంత మాత్రాన కీడు జరుగుతుందని భయపడాల్సిన అవసరంలేదు.

- ఆచార్య మల్లాప్రగడ శ్రీమన్నారాయణ మూర్తి, ప్రవచనకర్త