Madhya Pradesh: ‘ఏదో అదృశ్యశక్తి నా ఆహారాన్ని దొంగిలిస్తోంది’

భోపాల్‌: మధ్యప్రదేశ్‌లోని బేతుల్ జిల్లాలో ఓ మహిళ ఒక విచిత్రమైన కేసుతో పోలీసుల ముందుకు వచ్చారు. ఏదో అదృశ్య శక్తి ఆమె దుస్తులు, నగదును కాజేయడమే కాకుండా.. నగల బరువునూ తగ్గిస్తోందని ఆరోపిస్తూ పోలీసులను ఆశ్రయించారు. ఆమె ప్రధానమంత్రి రూరల్ రోడ్ మిషన్‌లో సబ్ ఇంజినీర్ కావడం గమనార్హం. స్థానికంగా ఓ అధికారి ఈ విషయాన్ని ధ్రువీకరించారు. తన ఆహారాన్ని గుర్తుతెలియని శక్తి తినేస్తోందని, ఆభరణాల బరువునూ తగ్గిస్తోందంటూ ఆమె ఇటీవల కొత్వాలి పోలీస్ స్టేషన్‌లో లిఖితపూర్వక ఫిర్యాదు చేసినట్లు స్టేషన్ ఇన్‌ఛార్జి రత్నాకర్ హింగ్వే తెలిపారు. గత నాలుగైదు రోజులుగా జరుగుతున్న ఈ చోరీ వ్యవహారాన్ని పరిష్కరించాలంటూ అందులో పేర్కొన్నారని చెప్పారు.

అయితే.. ఈ వ్యవహారంలో ఎటువంటి అదృశ్య శక్తుల పాత్ర లేదని పోలీసులు తోసిపుచ్చారు. ఆమె మానసిక సమస్యలతో బాధపడుతున్నారని, ఈ మేరకు కౌన్సెలింగ్ కోసం సైకియాట్రిస్ట్‌ వద్దకు పంపుతామని తెలిపారు. ఆభరణాల బరువు.. వాటి వినియోగం కారణంగా క్రమంగా అతి స్వల్ప మొత్తంలో తగ్గుతూ వస్తుందనేది దాదాపు అందరికి తెలిసిన విషయమేనని అన్నారు.