బెజవాడ దుర్గమ్మను దర్శించుకున్న కిష్‌న్‌రెడ్డి

విజయవాడ: ఇంద్రకీలాద్రిపై కొలువైన దుర్గమ్మను కేంద్ర మంత్రి కిషన్‌రెడ్డి దర్శించుకున్నారు. భాజపా రాష్ట్ర కార్యాలయం ప్రారంభోత్సవానికి విజయవాడ వచ్చిన ఆయన ఆదివారం ఉదయం అమ్మవారిని దర్శించుకున్నారు. ఆలయ మర్యాదలతో అధికారులు కిషన్‌రెడ్డికి స్వాగతం పలికారు. కరోనా మహమ్మారిపోయి ప్రజలు సుఖసంతోషాలతో ఉండేలా దీవించాలని దుర్గమ్మను వేడుకున్నట్టు కిషన్‌రెడ్డి తెలిపారు. కేంద్రమంత్రి వెంట ఎంపీ జీవీఎల్‌, ఎమ్మెల్సీ మాధవ్‌, విష్ణువర్ధన్‌రెడ్డి తదితరులు ఉన్నారు. ఈ సందర్భంగా కేంద్రమంత్రి కిషన్‌రెడ్డికి దుర్గగుడి ఈవో సురేశ్‌బాబు వినతిపత్రం సమర్పించారు. ప్రసాదం పథకం కింద రూ.85 కోట్లు మంజూరు చేయాలని కోరారు.