Telangana News: అమరుల త్యాగాలు ప్రతిబింబించేలా ఫినిషింగ్‌ ఉండాలి: ప్రశాంత్‌రెడ్డి

హైదరాబాద్‌: తెలంగాణ నూతన సచివాలయ పనుల పురోగతిని రాష్ట్ర మంత్రి వేముల ప్రశాంత్‌రెడ్డి పరిశీలించారు. అమరవీరులు స్మారకం పనులను పరిశీలించిన మంత్రి.. పనుల పురోగతిపై అధికారులకు పలు సూచనలు చేశారు. అమరుల స్మారకం నిర్మాణంపై అధికారులు దృష్టి పెట్టాలని.. వారి త్యాగాలు ప్రతిబింబించేలా ఫినిషింగ్‌ ఉండాలన్నారు. తెలంగాణ తల్లి విగ్రహం వద్ద నివాళులకు ఏర్పాట్లు చేయాలని సూచించారు. సచివాలయ నిర్మాణ పనుల్లో వేగం పెంచాలని అధికారులు, గుత్తేదారులను ఆదేశించారు. సచివాలయ ఎలివేషన్‌, క్లాడింగ్ పనులు వేగంగా పూర్తి చేయాలని.. గ్రాండ్‌ ఎంట్రీ నిర్మాణం ఫినిషింగ్‌పై ప్రత్యేకంగా దృష్టి సారించాలని అధికారులకు చెప్పారు. సీఎం కేసీఆర్ విధించిన నిర్ణీత గడువులోగా పనులు పూర్తి కావాలని ప్రశాంత్‌రెడ్డి అధికారులను ఆదేశించారు.