TS News: పార్టీ కార్యాలయాల వద్ద స్వాతంత్ర్య వేడుకలు

హైదరాబాద్‌: నగరంలోని వివిధ రాజకీయ పార్టీల కార్యాలయాల వద్ద సాతంత్ర్య వేడుకలను ఘనంగా నిర్వహించారు. తెరాస, కాంగ్రెస్‌, భాజపా కార్యాలయాల వద్ద ఆ పార్టీ ముఖ్యనేతలు వేడుకల్లో పాల్గొన్నారు. అధికార తెరాసకు చెందిన తెలంగాణ భవన్‌ వద్ద ఆ పార్టీ సెక్రటరీ జనరల్‌ కె.కేశవరావు జాతీయ జెండాను ఆవిష్కరించారు. ఈ కార్యక్రమానికి హుజూరాబాద్‌ తెరాస అభ్యర్థి గెల్లు శ్రీనివాస్‌యాదవ్‌, పార్టీ నేతలు హాజరయ్యారు.

కాంగ్రెస్‌ కార్యాలయం గాంధీభవన్‌ వద్ద టీపీసీసీ అధ్యక్షుడు రేవంత్‌రెడ్డి జాతీయ పతాకాన్ని ఎగురవేశారు. ఈ సందర్భంగా ఆయన మాట్లాడుతూ 75వ స్వాతంత్ర్య వేడుకలు జరుపుకొంటున్నామంటే కాంగ్రెస్‌ నేతల త్యాగాలే కారణమని చెప్పారు. ఎంతో మంది అమరులు తమ ప్రాణాలను బలి ఇచ్చి దేశానికి స్వాతంత్ర్యం తెచ్చారన్నారు. భాజపా కార్యాలయం వద్ద ఆ పార్టీ రాష్ట్ర అధ్యక్షుడు బండి సంజయ్‌ త్రివర్ణ పతాకాన్ని ఆవిష్కరించారు. ఈ సందర్భంగా రాష్ట్ర ప్రజలకు స్వాతంత్ర్య దినోత్సవ శుభాకాంక్షలు తెలిపారు.