Sabarimala: శబరిమల కొండలలో అక్రమ పూజలు

కేసు నమోదు చేసిన కేరళ అటవీశాఖ

పథనంథిట్ట: కేరళలోని శబరిమల అయ్యప్ప స్వామి ఆలయానికి నాలుగు కిలోమీటర్ల దూరంలోని పొన్నాంబళమేడు పర్వత శిఖరం మీద అక్రమంగా పూజలు చేసిన వ్యక్తి ఉదంతం కేరళలో సంచలనం రేపుతోంది. ఆ పూజల వీడియో సామాజిక మాధ్యమాల్లో చక్కర్లు కొడుతోంది. తమిళనాడుకు చెందిన నారాయణ స్వామి, మరో నలుగురితో కలసి ఈ పూజలు చేసినట్లు వీడియోలో గుర్తించారు. పొన్నాంబళమేడు పైనే మకరజ్యోతిని వెలిగిస్తారు. ఈ నేపథ్యంలో అయ్యప్ప భక్తులకు ఈ పర్వతం పరమ పవిత్రమైనది. దట్టమైన కారడవిలో ఉన్న ఈ పర్వతం అటవీ శాఖ పరిరక్షణలో ఉంటుంది. అలాంటి చోటుకు నిందితులు ఎలా ప్రవేశించగలిగారనే ప్రశ్నలు తలెత్తుతున్నాయి. దీనిపై పోలీసులకు, వన్యమృగ శరణాలయ అధిపతికీ ఫిర్యాదు చేస్తామని తిరువాన్కూరు దేవస్థానం బోర్డు అధ్యక్షుడు కె.అనంత గోపన్‌ తెలిపారు. ఈ వ్యవహారంపై కేసు నమోదు చేసి దర్యాప్తు చేపట్టామని రాష్ట్ర అటవీ శాఖ తెలిపింది.