రూ.60కే ఇంటి భోజనం

కేరళలో ఆదరణ పొందుతున్న డ్వాక్రా మహిళల ప్రాజెక్టు

ఈటీవీ భారత్‌: మొబైల్‌లో ఆర్డర్‌ చేస్తే చాలు.. తక్కువ ధరకు ఇంటికే లంచ్‌ బాక్స్‌ వస్తుంది. ఇది కేరళలో ఆదరణ పొందుతున్న డ్వాక్రా మహిళలు ప్రారంభించిన ‘కుటుంబశ్రీ లంచ్‌ బెల్‌ ప్రాజెక్టు’. ఈ నెల 5న కేరళ రాజధాని తిరువనంతపురంలో రాష్ట్ర మంత్రి ఎంబీ రాజేశ్‌ ఈ ప్రాజెక్ట్‌ను ప్రారంభించారు. మార్చి 6న సేవలు మొదలయ్యాయి. ఆర్డర్ల కోసం ‘పాకెట్‌ మార్ట్‌ మొబైల్‌’ యాప్‌ను అందుబాటులోకి తెచ్చారు. శాకాహార భోజనానికి రూ.60, మంసాహారానికి రూ.90 వసూలు చేస్తున్నారు. యాప్‌ ద్వారా ఉదయం 6 గంటల నుంచి లంచ్‌ బాక్స్‌ ఆర్డర్‌ చేయవచ్చు. సాయంత్రం 6 గంటల తర్వాత మరుసటి రోజు కోసం ఆర్డర్‌ చేసుకునే సదుపాయం కూడా ఉంది. ఉదయం 11 గంటల నుంచే లంచ్‌ బాక్స్‌లను డెలివరీ చేస్తుంటారు. మళ్లీ మధ్యాహ్నం 3 గంటలకు వచ్చి ఖాళీ బాక్స్‌ను తీసుకుంటారు. వీరికి కేవలం 16 రోజుల్లో 2000కుపైగా ఆర్డర్లు రావడం విశేషం. ఈ ప్రాజెక్టు కింద భోజనాన్ని తయారు చేసేందుకు 11 మంది, ఆహారం డెలివరీ కోసం 8 మంది ఉద్యోగులు ఉన్నారు. ఆదివారం మినహా మిగిలిన అన్ని రోజుల్లో శాఖాహార, మాంసాహార ఆహారం అందుబాటులో ఉంటుంది.