నిర్మాత విశాల్‌కు ఖర్చు తగ్గించాలని..!

రోబో శంకర్‌ ఏం చేశారంటే?

చెన్నై: కరోనా సంక్షోభం వల్ల అనేక మంది జీవితాలు తలకిందులయ్యాయి. ప్రత్యేకించి చిత్ర పరిశ్రమకు ఎంతో నష్టం వాటిల్లింది. ఆరు నెలలుగా థియేటర్లు మూతపడి ఉండటంతో సినిమాకు డబ్బులు పెట్టిన నిర్మాతలు తీవ్ర సమ్యలు ఎదుర్కొంటున్నారు. పలువురు ఓటీటీ వేదికగా తమ చిత్రాల్ని విడుదల చేశారు. ఈ నేపథ్యంలో నటుడు రోబో శంకర్ నిర్మాతకు డబ్బులు ఆదా చేయడం కోసం తన వంతు ప్రయత్నం చేశారు. తమిళ కథానాయకుడు విశాల్‌ నటిస్తున్న సినిమా ‘చక్ర’. ఎమ్‌.ఎస్‌. ఆనందన్‌ దర్శకత్వం వహిస్తున్నారు. శ్రద్ధా శ్రీనాథ్‌, రెజీనా కథానాయిక పాత్రలు పోషిస్తున్నారు. విశాల్‌ ఫిల్మ్‌ ఫ్యాక్టరీ పతాకంపై విశాల్‌ నిర్మిస్తున్నారు. దొంగతనం చుట్టూ సాగే సైబర్‌ క్రిమినల్‌ కథా చిత్రమిది.

ప్రస్తుతం ఈ చిత్రం షూటింగ్‌ చెన్నైలో జరుగుతోంది. ఇందులో రోబో శంకర్‌ పోలీసు అధికారిగా నటిస్తున్నారు. కాగా ఆయన సెట్‌లో ఉండగా తీసిన ఓ వీడియో సోషల్‌మీడియాలో చక్కర్లు కొడుతోంది. అందులో రోబో శంకర్‌ కేవలం ఖాకీ చొక్కా ధరించి, ఖాకీ ప్యాంటు లేకుండా ఉన్నారు. ఇలా ఎందుకు ఉన్నారని ఆయన్ను ప్రశ్నించగా.. ‘నేను నటించబోతున్నది క్లోజ్‌ అప్‌ షాట్‌. అందుకే కేవలం ఖాకీ చొక్కా ధరించా. దీని వల్ల నిర్మాతపై కొంత భారం తగ్గుతుంది’ అని చెప్పారు. కరోనా కాలంలో నిర్మాతల్ని ఆదుకోవాలని పేర్కొన్నారు. ఇప్పటికే పలువురు నటీనటులు, సాంకేతిక నిపుణులు తమ పారితోషికంలో కొంత భాగాన్ని తగ్గించుకుని ఆదర్శంగా నిలిచారు.