Alia Bhatt: మొదలైంది ‘జిగ్రా’ ప్రయాణం

‘‘నన్ను చూడు.. నువ్వు నా రాఖీ కట్టుకున్నావా? ఇప్పుడు మీరు నా రక్షణలో ఉన్నారు. నేను మీకు ఏమి జరగన్విను’’ అంటూ ఇటీవలే తన రాబోయే చిత్రం ‘జిగ్రా’ను ప్రకటించింది అలియా భట్‌. ఆమె కథానాయికగా నటిస్తూ.. తన ప్రొడక్షన్స్‌పై కరణ్‌ జోహార్‌తో కలిసి నిర్మిస్తున్న చిత్రమిది. వాసన్‌ బాలా ఈ చిత్రాన్ని తెరకెక్కిస్తున్నారు. తాజాగా ఈ సినిమా షూటింగ్‌ను ప్రారంభించినట్లు తెలిపింది చిత్రబృందం. ఈ విషయాన్ని సామాజిక మాధ్యమాల వేదికగా తెలుపుతూ సెట్స్‌ నుంచి కొన్ని ఫొటోలను పంచుకుంది అలియా. ‘మా ప్రయాణాన్ని మొదలుపెట్టాం.మా మనసుకు దగ్గరైన ఈ సినిమాని మీ ముందుకు తీసుకువస్తున్నాము. వేచి ఉండండి’ అని వ్యాఖ్యల్ని జోడించింది. ఈ చిత్రం వచ్చే ఏడాది సెప్టెంబరు 27న విడుదల కానుంది.