BholaaShankar: భోళా మానియా షురూ..

సంక్రాంతికి ‘వాల్తేరు వీరయ్య’గా సందడి చేశారు కథానాయకుడు చిరంజీవి (Chiranjeevi). ఇప్పుడాయన ‘భోళా శంకర్‌’ (BholaaShankar)తో అలరించేందుకు సిద్ధమవుతున్నారు. మెహర్‌ రమేష్‌ తెరకెక్కిస్తున్న ఈ చిత్రాన్ని రామబ్రహ్మం సుంకర నిర్మిస్తున్నారు. తమన్నా కథానాయిక. చిరు చెల్లిగా కీర్తి సురేష్‌ నటిస్తుండగా.. సుశాంత్‌ కీలక పాత్ర పోషిస్తున్నారు. ఈ సినిమా ఆగస్టు 11న విడుదల కానున్న నేపథ్యంలో ప్రచార పర్వాన్ని వేగవంతం చేస్తోంది చిత్ర బృందం. ఇందులో భాగంగా ఈ నెల 4న ‘భోళా మానియా’ పేరుతో తొలి గీతాన్ని విడుదల చేయనున్నారు. దీనికి సంబంధించిన ప్రోమోను శుక్రవారం బయటకొదిలారు. అందులో చిరు మాస్‌ స్టైలిష్‌ లుక్‌లో ఓ చేత్తో కూలింగ్‌ గ్లాసెస్‌ పెట్టుకుంటూ.. మరో చేత్తో త్రిశూలం లాకెట్‌ ఉన్న కీచైన్‌ను తిప్పుతూ ఆసక్తికరంగా కనిపించారు. ‘‘భావోద్వేగాలతో నిండిన కమర్షియల్‌ ఎంటర్‌టైనర్‌ ఇది. యాక్షన్‌కు ప్రాధాన్యముంది. అన్ని వర్గాల ప్రేక్షకులకు నచ్చేలా ఉంటుంది. ఈ నెలాఖరు నాటికి చిత్రీకరణ పూర్తవుతుంది. నిర్మాణాంతర పనులు శరవేగంగా జరుగుతున్నాయి’’ అని చిత్ర వర్గాలు తెలిపాయి. ఈ సినిమాకి సంగీతం: మహతి స్వర సాగర్‌, ఛాయాగ్రహణం: డడ్లీ.