Gandharva: వినూత్నమైన కథాంశంతో.. ‘గంధర్వ’

సందీప్‌ మాధవ్‌(Sandeep Madhav), గాయత్రి ఆర్‌.సురేష్‌ జంటగా నటించిన చిత్రం ‘గంధర్వ’ (Gandharva). అఫ్సర్‌ దర్శకుడు. ఫన్నీ ఫాక్స్‌ ఎంటర్‌టైన్‌మెంట్‌, ఎస్‌.కె.ఫిల్మ్స్‌ సంస్థలు సంయుక్తంగా నిర్మించాయి. ఈ సినిమా జులై 8న ప్రేక్షకుల ముందుకు రానుంది. ఈ నేపథ్యంలో ఇటీవల హైదరాబాద్‌లో విలేకర్ల సమావేశం నిర్వహించారు. ఈ సందర్భంగా హీరో సందీప్‌ మాట్లాడుతూ.. ‘‘టైటిల్‌లోనే కొత్తదనం ఉంది. ఫ్యామిలీ డ్రామా, సైన్స్‌ ఫిక్షన్‌, కామెడీ, యాక్షన్‌, థ్రిల్లింగ్‌ అంశాలను మేళవించి అందరికీ నచ్చేలా చిత్రం రూపొందించాం. ఆద్యంతం ఆసక్తికరంగా సాగుతుంది’’ అన్నారు. ‘‘ఓ వినూత్నమైన కథాంశంతో రూపొందిన చిత్రమిది. గంధర్వ పాత్రలో సందీప్‌ చక్కగా ఒదిగిపోయారు. జులై 8న సినిమా చూసి ఆనందించండి’’ అన్నారు దర్శకుడు. నిర్మాత సురేష్‌ కొండేటి మాట్లాడుతూ.. ‘‘భారతీయ సినిమాలో ఇప్పటివరకు రాని పాయింట్‌తో ఈ చిత్రం రూపొందింది. ‘ప్రేమిస్తే’, ‘జర్నీ’లాగే ఈ కథనూ నమ్మి తీసుకున్నా. మా ప్రయత్నాన్ని అందరూ ఆదరిస్తారని ఆశిస్తున్నా’’ అన్నారు.