Maruthi Nagar Subramanyam: మేడమ్‌ సార్‌.. మేడమ్‌ అంతే

రావు రమేశ్‌ కథానాయకుడిగా... లక్ష్మణ్‌ కార్య దర్శకత్వంలో తెరకెక్కుతున్న చిత్రం ‘మారుతినగర్‌ సుబ్రమణ్యం’. అంకిత్‌ కొయ్య, రమ్య పసుపులేటి జంటగా నటించారు. ఇంద్రజ, హర్షవర్ధన్‌ కీలక పాత్రలు పోషించారు. బుజ్జి రాయుడు పెంట్యాల, మోహన్‌ కార్య నిర్మాతలు. ‘మేడమ్‌ సార్‌ మేడమ్‌ అంతే...’ అంటూ సాగే ఈ సినిమాలోని రెండో గీతాన్ని బుధవారం విడుదల చేశారు. అంకిత్‌ కొయ్య, రమ్య పసుపులేటిపై చిత్రీకరించిన ఈ పాటని భాస్కరభట్ల రచించగా, సిద్‌ శ్రీరామ్‌ ఆలపించారు. కల్యాణ్‌ నాయక్‌ స్వరపరిచారు. సినిమాలో రావు రమేశ్‌ తనయుడిగా, అల్లు అర్జున్‌కి వీరాభిమానిగా అంకిత్‌ కొయ్య కనిపిస్తారు. ఆయన ప్రేమించే అమ్మాయిగా రమ్య పసుపులేటి నటించారు. అల్లు అర్జున్‌ సినిమాల్లో హీరో పరిచయ సన్నివేశాల్ని ఊహించుకుంటూ పాడుకునే ప్రేమపాటగా ‘మేడమ్‌ సార్‌ మేడమ్‌ అంతే...’ సాగుతుందని  సినీ వర్గాలు తెలిపాయి. ఈ సినిమా నిర్మాణానంతర కార్యక్రమాలు కొనసాగుతున్నాయని, త్వరలోనే విడుదల తేదీని వెల్లడిస్తామని దర్శకనిర్మాతలు తెలిపారు.