Guntur Karam: గుంటూరు ఘాటు

పేరుకి తగ్గట్టే మా ‘గుంటూరు కారం’ చాలా ఘాటుగా ఉంటుందని చెబుతున్నాయి సినీ వర్గాలు. మహేశ్‌బాబు కథానాయకుడిగా త్రివిక్రమ్‌ దర్శకత్వంలో రూపొందుతున్న చిత్రమిది. శ్రీలీల, మీనాక్షి చౌదరి కథానాయికలు. హారిక అండ్‌ హాసిని క్రియేషన్స్‌ పతాకంపై ఎస్‌.రాధాకృష్ణ నిర్మిస్తున్నారు. ‘అతడు’, ‘ఖలేజా’ తర్వాత మహేశ్‌బాబు - త్రివిక్రమ్‌ కలిసి చేస్తున్న చిత్రమిది. బుధవారం మహేశ్‌బాబు పుట్టినరోజు. ఈ సందర్భంగా ప్రచార చిత్రాల్ని విడుదల చేశాయి సినీవర్గాలు. వాటిలో మహేశ్‌ మాస్‌ అవతారంలో కనిపించడం ప్రేక్షకుల్ని కట్టిపడేసింది. ‘‘అంచనాలకి దీటుగా చిత్రం రూపొందుతోంది. ఆగస్టు ద్వితీయార్ధం నుంచి చిత్రీకరణని పునః ప్రారంభిస్తాం. సంక్రాంతి సందర్భంగా జనవరి 12న ప్రేక్షకుల ముందుకు తీసుకొస్తామ’’ని  చిత్రబృందం తెలిపింది.