Kiara Advani: పెళ్లి కబురు అప్పుడేనా?

సొగసులతో కవ్విస్తూ.. ఆకట్టుకునే నటన ప్రదర్శించడంలో కథానాయిక కియారా అడ్వాణీ (Kiara Advani) ముందుంటుంది. ‘లస్ట్‌ స్టోరీస్‌’, ‘కబీర్‌ సింగ్‌,’ ‘ఇందూ కీ జవానీ’, ‘జుగ్‌జుగ్‌ జీయో’లలో అదే తీరుతో ప్రేక్షకులను చెక్కిలిగింతలు పెట్టింది. తెరపై కవ్వించడంలోనే కాదు.. నిజ జీవితంలోనూ నేను చిలిపేనని నిరూపించుకుంటోంది కియారా. దానికి సాక్ష్యం ఆదివారం రోజున తను ఇన్‌స్టాగ్రామ్‌లో పంచుకున్న వీడియో. ఈ నాలుగైదు సెకన్ల అతిచిన్న వీడియోక్లిప్‌లో పాలనురగలాంటి డ్రెస్‌ ధరించి, చిరునవ్వులు చిందిస్తూ.. సిగ్గుల మొగ్గైంది. దీనికి ‘రహస్యాన్ని ఎక్కువ కాలం దాచలేను. అతి త్వరలో డిసెంబరు 2న వెల్లడిస్తాను. అప్పటిదాకా ఎదురుచూస్తూ ఉండండి’ అనే క్యాప్షన్‌ జోడించింది. దీనిపై అభిమానులు రకరకాలుగా స్పందిస్తున్నారు. సిద్ధార్థ్‌ మల్హోత్రాతో (Sidharth Malhotra) పెళ్లి విషయాన్ని వెల్లడిస్తుందని ఒకరంటే.. తను నటించబోయే కొత్త సినిమా విషయం చెబుతుంది కాబోలు అని ఇంకొకరంటున్నారు. ప్రి-వెడ్డింగ్‌ వీడియోలు మనతో పంచుకుంటుందేమో అని ఇంకో నెటిజన్‌ అంచనా వేస్తున్నాడు. ఈ చిలిపి వీడియో వెనుక ఉన్న సంగతేంటో తెలియాలంటే ఇంకో నాలుగు రోజులు ఆగాల్సిందే. కియారా.. విక్కీ కౌశల్‌తో కలిసి నటించిన ‘గోవిందా నామ్‌ మేరా’ డిసెంబరు 16న విడుదలకు సిద్ధంగా ఉంది.