Family Star: ఫ్యామిలీ స్టార్‌ రాక ఆ రోజేనా?

విజయ్‌ దేవరకొండను ‘ఫ్యామిలీస్టార్‌’గా మారుస్తున్నారు దర్శకుడు పరశురామ్‌. ‘గీత గోవిందం’ లాంటి విజయం తర్వాత ఈ ఇద్దరి కలయికలో రూపొందుతోన్న చిత్రమిది. దిల్‌రాజు, శిరీష్‌ సంయుక్తంగా నిర్మిస్తున్నారు. మృణాల్‌ ఠాకూర్‌ కథానాయిక. సంక్రాంతి బరిలో నిలవాల్సిన ఈ సినిమా చిత్రీకరణ ఆలస్యం కావడంతో వేసవికి వాయిదా పడిన సంగతి తెలిసిందే. ఇప్పుడీ చిత్రాన్ని ఏప్రిల్‌ 5న విడుదల చేయనున్నారని సమాచారం. దీనిపై చిత్ర బృందం ఇప్పటికే తుది నిర్ణయం తీసుకున్నట్లు తెలుస్తోంది. ఈ సినిమా చిత్రీకరణ ప్రస్తుతం హైదరాబాద్‌లో జరుగుతోంది. విజయ్‌పై ఓ భారీ యాక్షన్‌ సీక్వెన్స్‌ తెరకెక్కిస్తున్నారు. ఫిబ్రవరి 20 నాటికి మొత్తం చిత్రీకరణ పూర్తి చేయనున్నారని ప్రచారం వినిపిస్తోంది. ఈ చిత్రానికి సంగీతం: గోపీ సుందర్‌, ఛాయాగ్రహణం: కె.యు.మోహనన్‌.