Kannappa: ‘కన్నప్ప’లో అక్షయ్‌ పని పూర్తి

‘కన్నప్ప’తో సినీప్రియుల్ని అలరించేందుకు సిద్ధమవుతున్నారు మంచు విష్ణు. ఆయన టైటిల్‌ పాత్రలో నటిస్తున్న ఈ పాన్‌ ఇండియా చిత్రాన్ని ముఖేష్‌ కుమార్‌ సింగ్‌ తెరకెక్కిస్తున్నారు. మోహన్‌బాబు నిర్మిస్తున్నారు. బాలీవుడ్‌ హీరో అక్షయ్‌ కుమార్‌ ముఖ్య పాత్ర పోషిస్తున్నారు. ఆయన ఇటీవలే ఈ చిత్ర సెట్స్‌లోకి అడుగు పెట్టిన సంగతి తెలిసిందే. తాజాగా ఆయన పాత్రకు సంబంధించిన చిత్రీకరణ పూర్తయినట్లు చిత్ర బృందం శుక్రవారం ప్రకటించింది. ఈ మేరకు అక్షయ్‌తో దిగిన ఓ ఫొటోను సామాజిక మాధ్యమాల్లో పంచుకున్నారు మంచు విష్ణు. ‘‘అక్షయ్‌ కుమార్‌తో పని చేయడం ఆనందంగా ఉంది. ఆయన్నుంచి ఎంతో నేర్చుకున్నాను. ఈ ప్రయాణం ఎంతో విలువైనది. ఇలా ఇంకా ఎన్నోసార్లు కలవాలని కోరుకుంటున్నా’’ అంటూ తన పోస్ట్‌కు ఓ వ్యాఖ్యను కూడా జోడించారు విష్ణు. అక్షయ్‌ ఈ చిత్రంలో శివుడి పాత్రలో కనిపించనున్నట్లు సమాచారం. నందీశ్వరుడి పాత్రను ప్రభాస్‌ పోషించనున్నట్లు ప్రచారం సాగుతోంది. ప్రస్తుతం ముగింపు దశ చిత్రీకరణలో ఉన్న ఈ సినిమా త్వరలో ప్రేక్షకుల ముందుకు రానుంది.