Kantara: త్వరలో కుందాపురానికి ‘కాంతార 1’

‘కాంతార’ సినిమాతో జాతీయ స్థాయిలో సత్తా చాటారు రిషబ్‌ శెట్టి. ఇప్పుడీ సినిమాకి ప్రీక్వెల్‌గా ‘కాంతార: చాప్టర్‌ 1’ సిద్ధమవుతోంది. రిషబ్‌ హీరోగా నటిస్తూ.. స్వయంగా తెరకెక్కిస్తున్న చిత్రమిది. హోంబలే ఫిల్మ్స్‌ సంస్థ నిర్మిస్తోంది. గత కొన్నాళ్లుగా పూర్వ నిర్మాణ పనుల్లో ఉన్న ఈ సినిమా ఇప్పుడు చిత్రీకరణ ప్రారంభించుకునేందుకు సిద్ధమైంది. వచ్చే వారంలోనే ఈ చిత్ర తొలి షెడ్యూల్‌ మొదలు కానుందని సమాచారం. ఇందుకోసం కుందాపురలోని తీర ప్రాంతంలో ఓ భారీ సెట్‌ను సిద్ధం చేసింది చిత్ర బృందం. దాదాపు 20రోజుల పాటు సాగే ఈ షెడ్యూల్‌లో కుందాపుర పరిసర ప్రాంతాల్లోని అడవుల్లోనూ.. అక్కడ నిర్మించిన సెట్‌లోనూ కీలక సన్నివేశాల్ని చిత్రీకరించనున్నట్లు తెలిసింది. ప్రస్తుతం ఈ సినిమా కోసం రిషబ్‌తో పాటు మిగిలిన ప్రధాన తారాగణం కళరిపయట్టు, గుర్రపు స్వారీలో కఠిన శిక్షణ తీసుకుంటున్నారు. ఈ చిత్రానికి అజనీష్‌ లోక్‌నాథ్‌ సంగీతమందిస్తుండగా.. అరవింద్‌ కశ్యప్‌ ఛాయాగ్రాహకుడిగా వ్యవహరిస్తున్నారు.