Yami Gautham: ఆ ఆనందం మాటల్లో చెప్పలేనిది

‘నేను మొదటగా సంతోషపడేది నన్ను నేను తెరపై చూసుకున్నప్పుడే’ అని అంటోంది బాలీవుడ్‌ కథానాయిక యామీ గౌతమ్‌. ‘ఆర్టికల్‌ 370’తో భారీ విజయాన్ని అందుకుందీమె. హిందీలోనే కాదు తెలుగు చిత్రాల్లోనూ నటించి టాలీవుడ్‌ ప్రేక్షకులను అలరించింది. తాజాగా ఓ ఇంటర్వ్యూలో పాల్గొన్న యామి చిత్రాల ఎంపిక విషయం గురించి చర్చించింది. ‘ఈ కథ ఓటీటీలో విడుదల కావాలి...అది థియేటర్లలో విడుదలైతేనే ప్రేక్షకులు ఆదరిస్తారన్న భావనతో కథలను ఎంపిక చేసుకోను. అందులో ఉండే పాత్రను దృష్టిలో పెట్టుకొని మాత్రమే ఆ ప్రాజెక్టులు చేయాలని నిర్ణయించుకుంటా. ఎంచుకునే పాత్రే కథలో ముఖ్య పాత్ర పోషిస్తోంది. ప్రేక్షకులు కథకు కనెక్ట్‌ అవ్వాలి. వేదికేదైనా వారు ఆ కథతో ముందుకు సాగాలనేది నా అభిప్రాయం. ఏదేమైనా నన్ను నేను తెరపై చూసుకున్నప్పుడు కలిగే ఆ ఆనందం మాటల్లో చెప్పలేనిది’ అని చెప్పుకొచ్చింది. ‘థియేటర్లలో అభిమానుల చప్పట్లు, ఈలలు సినిమాపై గౌరవాన్ని పెంచుతాయి’ అంటూ ముగించింది.