Vani kapoor: వాణీ కోసమే ఈ పాత్ర!

నటనకు ప్రాధాన్యమున్న పాత్రల్ని ఎంచుకుంటూ ప్రేక్షకుల్ని మెప్పిస్తుంది బాలీవుడ్‌ నాయిక వాణీ కపూర్‌. ఇప్పుడామె మరో కొత్త ప్రాజెక్టుకు పచ్చజెండా ఊపింది. ఆమె ప్రధాన పాత్రలో ‘బడ్తమీజ్‌ గిల్‌’ అనే సినిమా రాబోతున్నట్లు ప్రకటించింది చిత్రబృందం. నవజ్యోత్‌ గులాటి ఈ చిత్రాన్ని తెరకెక్కిస్తున్నారు. ‘‘ఈ కథకు అందంతోపాటు ఆత్మవిశ్వాసం ఉన్న అమ్మాయి అవసరం. తన స్నేహితులు, కుటుంబం కోసం ఎంత దూరమైన వెళ్లాలి. వాణి నిజజీవితంలో ఇలాంటి వ్యక్తిత్వం గల అమ్మాయి. ఆమెను దృష్టిలో ఉంచుకొనే ఈ కథను తీర్చిదిద్దాము. ఈ పాత్రకు వాణి మాత్రమే సరిపోతుందని మేము బలంగా నమ్ముతున్నాము. మునుపెన్నడూ చూడని విధంగా ఇందులో ఆమెను చూపించబోతున్నాము. ఈ నెల మొదటి వారంలో చిత్రీకరణను ప్రారంభించనున్నామ’’ని చిత్రబృందం తెలిపింది. కామెడీ, ఫ్యామిలీ ఎంటర్‌టైనర్‌గా రూపొందుతున్న ఈ చిత్రంలో పరేష్‌ రావేల్‌, అపర్శక్తి ఖురానా కీలక పాత్రలు పోషిస్తున్నారు. నిక్కీ భగ్నానీ, విక్కీ భగ్నానీ సంయుక్తంగా నిర్మిస్తున్నారు. ప్రస్తుతం ‘రైడ్‌ 2’, ‘ఖేల్‌ ఖేల్‌ మే’ చిత్రాలతో బిజీగా ఉంది వాణీ కపూర్‌.