Mahesh Babu: ‘దసరా’పై సూపర్‌స్టార్‌ అదిరిపోయే ప్రశంస

హైదరాబాద్‌: నేచురల్‌ స్టార్‌ నాని (Nani) నటించిన ఊరమాస్‌ ఎంటర్‌టైనర్‌ ‘దసరా’ (Dasara). శ్రీకాంత్‌ ఓదెల దర్శకుడు. విడుదలైన రోజు నుంచి బాక్సాఫీస్‌ను షేక్‌ చేస్తోన్న ఈ సినిమాపై సూపర్‌స్టార్‌ మహేశ్‌బాబు (Mahesh Babu) ప్రశంసల వర్షం కురిపించారు. సినిమా అద్భుతంగా ఉందని, ఈ సినిమా విషయంలో తాను ఎంతగానో గర్విస్తున్నానని అన్నారు. ప్రస్తుతం ఈ ట్వీట్‌ నెట్టింట వైరల్‌గా మారింది. దీనిపై నాని అభిమానులు ఆనందం వ్యక్తం చేస్తున్నారు. మరోవైపు మహేశ్‌కు ధన్యవాదాలు చెబుతూ చిత్ర నిర్మాణ సంస్థ రిప్లై ఇచ్చింది.

నాని నటించిన మొదటి పాన్‌ ఇండియా ప్రాజెక్ట్‌ ఇది. కీర్తి సురేశ్‌ కథానాయిక. శ్రీరామ నవమిని పురస్కరించుకుని మార్చి 30న దీనిని విడుదల చేశారు. తెలుగుతోపాటు మిగిలిన భాషల్లోనూ ఇది మంచి టాక్‌ను అందుకుంది. ధరణి, వెన్నెలగా నాని-కీర్తిసురేశ్‌ల నటన కట్టిపడేసేలా ఉందని సోషల్‌మీడియా వేదికగా సినీ ప్రియులు పొగడ్తల వర్షం కురిపిస్తున్నారు.