Bangarraju: పోటీలోకి ‘బంగార్రాజు’ వస్తున్నాడా? నాగార్జున నిర్ణయం ఏంటి?

హైదరాబాద్‌: నాగార్జున కథానాయకుడిగా కల్యాణకృష్ణ దర్శకత్వంలో తెరకెక్కుతున్న చిత్రం ‘బంగార్రాజు’. నాగచైతన్య కీలక పాత్ర పోషిస్తున్నారు. శరవేగంగా చిత్రీకరణ జరుపుకొంటున్న ఈ సినిమా విడుదలపై ప్రస్తుతం ఆసక్తి నెలకొంది. కుటుంబ కథా చిత్రంగా తెరకెక్కుతున్న ‘బంగార్రాజు’ను సంక్రాంతి కానుకగా విడుదల చేస్తే ఎలా ఉంటుంది? అన్న దానిపై ప్రస్తుతం చిత్ర బృందం చర్చిస్తున్నట్లు సమాచారం. అయితే, దీనిపై ఇంకా తుది నిర్ణయం తీసుకోలేదట.

ఇప్పటికే సంక్రాంతి రేసులో స్టార్‌ హీరోల సినిమాలు ఉన్నాయి. ముగ్గుల పండగకు ముందుగానే ‘ఆర్ఆర్ఆర్‌’ సందడి చేయనుండగా, ప్రభాస్‌ ‘రాధేశ్యామ్‌’ వారం ఆగి రానుంది. తాను కూడా వెనక్కి తగ్గేది లేదు అంటూ ‘భీమ్లానాయక్‌’ దూసుకొస్తున్నారు. సినిమా విడుదల వాయిదా విషయంలో మరో ఆలోచన చేయకుండా, సంక్రాంతి బరిలోనే దించాలని పవన్‌ గట్టి పట్టుదలతో ఉన్నట్లు తెలుస్తోంది. ఒకవేళ ‘భీమ్లానాయక్‌’ వెనక్కి తగ్గితే తమ చిత్రాన్ని రేసులో పెట్టాలని ‘బంగార్రాజు’ చిత్ర బృందం భావిస్తోందట. దీంతో పవన్‌ సినిమా విడుదలపై నాగార్జున సినిమా ప్రకటన ఆధారపడి ఉంది. ఏదేమైనా ఈ సంక్రాంతికి సినిమా సందడి మామూలుగా ఉండదు.

► Read latest Cinema News and Telugu News