Tollywood: ‘ఓసీ’ కథేంటి?

కిరణ్‌ లోవ, లక్ష్మి కిరణ్‌, హరీష్‌ బొంపల్లి, మంజీర ప్రధాన పాత్రల్లో కిరణ్‌, విష్ణు సంయుక్తంగా తెరకెక్కిస్తున్న చిత్రం ‘ఓసీ’. విష్ణు శరణ్‌ బొంపల్లి నిర్మాత. ఈ సినిమా బుధవారం హైదరాబాద్‌లో పూజా కార్యక్రమాలతో   లాంఛనంగా ప్రారంభమైంది. ముహూర్తపు సన్నివేశానికి దర్శకుడు వి.వి.వినాయక్‌ క్లాప్‌ నివ్వగా.. మునిరాజ్‌ గుత్తా కెమెరా స్విచ్చాన్‌ చేశారు. సత్య మాస్టర్‌ గౌరవ దర్శకత్వం వహించారు. ఈ సందర్భంగా హీరో, దర్శకుడు కిరణ్‌ మాట్లాడుతూ.. ‘‘విషయం ఉన్న వాడు విలేజ్‌లో ఉన్నా ఏదైనా సాధించగలడు అనే కాన్సెప్ట్‌తో ఈ సినిమా తెరకెక్కిస్తున్నాం. షూటింగ్‌ మొత్తం హైదరాబాద్‌లోనే ఉంటుంది’’ అన్నారు. ‘‘ఈ చిత్రానికి కథే హీరో. మా తొలి ప్రయత్నాన్ని ఆదరిస్తారని కోరుకుంటున్నాం’’ అన్నారు నిర్మాత. ఈ చిత్రానికి సంగీతం: అక్షర్‌ బ్యాండ్‌ పివియల్‌యన్‌ మూర్తి, ఛాయాగ్రహణం: నట్రాజ్‌ అయాన్‌.