Pushpa: 50 రోజులు.. ‘పుష్ప’ కలెక్షన్స్‌పై టీమ్‌ ప్రకటన

హైదరాబాద్‌: ‘పుష్ప’తో ఇటీవల సూపర్‌సక్సెస్‌ని సొంతం చేసుకున్నారు ఐకాన్‌స్టార్‌ అల్లు అర్జున్‌. ఆయన ప్రధాన పాత్రలో నటించిన ఈ యాక్షన్‌ ఎంటర్‌టైనర్‌ గతేడాది డిసెంబర్‌లో విడుదలై బాక్సాఫీస్‌ వద్ద మంచి వసూళ్లను రాబట్టింది. శుక్రవారంతో ఈ సినిమా 50 రోజులు పూర్తి చేసుకుంది. ఈ సందర్భంగా చిత్రబృందం ఓ స్పెషల్‌ పోస్టర్‌ విడుదల చేసింది. ‘ఆల్‌ ఇండియా ‘మాసి’వ్‌ బ్లాక్‌బస్టర్‌’ పేరిట విడుదల చేసిన ఈ పోస్టర్‌లో ఇప్పటి వరకూ ‘పుష్ప’ ఎంత కలెక్ట్‌ చేసిందనే విషయాన్ని తెలిపింది. ఈ మేరకు ప్రపంచవ్యాప్తంగా 50 రోజుల్లో రూ.365 కోట్లు గ్రాస్‌ వసూళ్లు చేసిందని ప్రకటించింది.

శేషాచలం అడవుల్లో జరిగే ఎర్రచందనం స్మగ్లింగ్‌ నేపథ్యంతో ‘పుష్ప’ను నిర్మించారు. సుకుమార్‌ దర్శకుడు. ఈ చిత్రంలో బన్నీ పుష్పరాజ్‌ పాత్రలో, ఆయనకు జోడీగా రష్మిక నటించారు. మంగళం శ్రీనుగా సునీల్‌ నటన అందర్నీ మెప్పించింది. మొదటి భాగంలో ఓ రోజువారీ కూలీ (అల్లు అర్జున్‌) ఎర్రచందనం స్మగ్లింగ్‌ సిండికేట్‌కు అధినేతగా మారే క్రమంలో ఎదుర్కొన్న సవాళ్లను చూపించారు. దీనికి కొనసాగింపుగా ‘పుష్ప ది రూల్‌’ రానుంది.