Rajamouli: కృషితో కల నెరవేరుతుంది

గౌరీశ్‌ యేలేటి, రోషిణి, ప్రాచీ ఠక్కర్‌ నాయకానాయికలుగా తెరకెక్కుతున్న చిత్రం ‘ఓ కల’. దీపక్‌ కొలిపాక దర్శకత్వం వహిస్తున్నారు. లక్ష్మీనవ్య మోతూరు, రంజిత్‌కుమార్‌ కొడాలి, ఆదిత్య రెడ్డి నిర్మాతలు. దీని ఫస్ట్‌లుక్‌ని శనివారం హైదరాబాద్‌లో జరిగిన ఓ కార్యక్రమంలో ప్రముఖ దర్శకుడు ఎస్‌.ఎస్‌.రాజమౌళి విడుదల చేశారు. అనంతరం ఆయన మాట్లాడుతూ ‘‘సినిమా అనేది చాలా మంది కల. ఈ చిత్ర బృందం ఆ కలని నెరవేర్చుకుంది. ఇంకా ఎంతోమంది ఈ కలతో బతుకుతున్నారు. గట్టిగా కృషి చేస్తే వాళ్లందరి కల నెరవేరుతుంది. ఈ సినిమా ఫస్ట్‌లుక్‌ ఆకర్షణీయంగా ఉంది. దర్శకుడు దీపక్‌ కొలిపాక ఈ చిత్రాన్ని అద్భుతంగా తెరకెక్కిస్తున్నారని భావిస్తున్నా’’ అన్నారు. దర్శకుడు మాట్లాడుతూ ‘‘రాజమౌళి చేతులమీదుగా మా ఫస్ట్‌లుక్‌ విడుదల కావడం ఆనందంగా ఉంది. ఆయనెప్పుడూ  దర్శకులకి గొప్ప స్ఫూర్తి. వాణిజ్యాంశాల్ని మేళవించిన ఓ మంచి వినోదాత్మక చిత్రాన్ని ప్రేక్షకుల ముందుకు తీసుకొస్తాం’’ అన్నారు. ఈ కార్యక్రమంలో ‘హిట్‌’ సినిమా దర్శకుడు శైలేష్‌ కొలనుతోపాటు, చిత్రబృందం పాల్గొంది.