RC15: మరొక వివాదంలో రామ్‌చరణ్‌-శంకర్‌ మూవీ

ఇంటర్నెట్‌డెస్క్‌: ప్రస్తుతం తెలుగు చిత్ర పరిశ్రమలో విపరీతమైన క్రేజ్‌ ఉన్న చిత్రాల్లో ‘RC15’ ఒకటి. రామ్‌చరణ్‌ కథానాయకుడిగా భారీ చిత్రాల దర్శకుడు శంకర్‌ తెరకెక్కిస్తున్న ఈ సినిమాపై అంచనాలు తారస్థాయిలో ఉన్నాయి. అయితే, ఈ సినిమా ప్రకటించిన నాటి నుంచి ఏదో ఒక వివాదం దర్శకుడు శంకర్‌ను చుట్టు ముడుతూనే ఉంది. ‘భారతీయుడు2’ పూర్తి చేసిన తర్వాతే శంకర్‌ మరో మూవీ చేయాలని ఆ చిత్ర నిర్మాతలు న్యాయస్థానాన్ని ఆశ్రయించారు. ఆ తర్వాత బాలీవుడ్‌లో ‘అపరిచితుడు’ రీమేక్‌పైనా వివాదం నెలకొంది. తాజాగా ‘RC15’ కథ నాదేనంటూ దక్షిణ భారత సినీ రచయితల సంఘాన్ని ఆశ్రయించాడు ఓ రచయిత.

కార్తీక్‌ సుబ్బరాజు దగ్గర సహాయకుడిగా పనిచేసిన సెల్లముత్తు తన కథతోనే శంకర్‌-రామ్‌చరణ్‌ మూవీ తీస్తున్నారని ఆరోపించారు. ప్రస్తుతం దీనిపై విచారణ జరుగుతోంది. ఇరువురి వాదనలు విన్న తర్వాత అసోసియేషన్‌ తుది తీర్పు వెల్లడించనుంది. కార్తీక్‌ సుబ్బరాజు దగ్గరి నుంచే శంకర్‌ ఈ మూవీ కథను తీసుకున్నారని గతంలో వార్తలు వచ్చిన నేపథ్యంలో తాజా వివాదం ఆసక్తికరంగా మారింది. శ్రీ వేంకటేశ్వర క్రియేషన్స్‌ పతాకంపై దిల్‌రాజు ఈ సినిమాను నిర్మిస్తున్నారు. కియారా అడ్వాణీ, అంజలి తదితరులు కీలక పాత్రలు పోషిస్తున్నారు. మొదటి షెడ్యూల్‌లో ఓ పాటను చిత్రీకరించేందుకు శంకర్‌ ఏర్పాట్లు చేసుకుంటున్నారు.