Radheshyam: ‘రాధేశ్యామ్‌’ 2022లోనే అని నాలుగేళ్ల కిందే చెప్పారు

రాధాకృష్ణ కుమార్‌

‘‘మనకూ... మన నమ్మకానికీ మధ్య జరుగుతున్న యుద్ధమే ‘రాధేశ్యామ్‌’ కథ. ఇది జరిగిపోయింది కాదు, జరగబోయేది కాదు... ఎప్పుడూ జరిగే ఓ కథ’’ అన్నారు రాధాకృష్ణ కుమార్‌. ఆయన దర్శకత్వం వహించిన చిత్రం ‘రాధేశ్యామ్‌’. ప్రభాస్‌, పూజా హెగ్డే జంటగా నటించారు. యు.వి.క్రియేషన్స్‌ పతాకంపై వంశీ, ప్రమోద్‌, ప్రసీద నిర్మిస్తున్నారు. గోపీకృష్ణ మూవీస్‌ పతాకంపై కృష్ణంరాజు సమర్పిస్తున్నారు. పాన్‌ ఇండియా స్థాయిలో రూపొందిన ఈ చిత్రం ఈ నెల 14న ప్రేక్షకుల ముందుకొస్తోంది. ఈ సందర్భంగా చిత్ర సాంకేతిక బృందం శనివారం హైదరాబాద్‌లో విలేకర్లతో సమావేశమైంది. ఆ విషయాలివీ...

‘‘ప్రభాస్‌ ఇమేజ్‌ విషయంలో అభిమానుల అంచనాలకు మించి ఉంటుందీ చిత్రం. పద్దెనిమిదేళ్ల కిందట విన్న ఈ కథాలోచన నాలో స్ఫూర్తిని రగిలించింది. వేల ఏళ్లుగా ఉన్న ఓ ప్రశ్న. అయితే దానికి సమాధానం చెబుతున్నానని కాదు కానీ, దానికి నా వివరణ  ఏమిటన్నది తెరపైనే చూడాలి. ఈ కథ ఈ స్థాయికి రావడానికి నా గురువు చంద్రశేఖర్‌ ఏలేటి, కథానాయకుడు ప్రభాస్‌లే కారణం. నిర్మాతలు వంశీ, ప్రమోద్‌, విక్రమ్‌ ఈ రోజు వరకూ ఏది కావాలంటే అది ఇచ్చారు. ఈ సినిమా కోసం తమిళనాడు, మహారాష్ట్ర, ఆంధ్రప్రదేశ్‌లో పెద్ద పెద్ద జ్యోతిష్యుల్ని కలిశాం. వాళ్లలో ఒకరు ముందే చెప్పారు... ఈ చిత్రం 2022 ప్రథమార్థంలో విడుదలయ్యే అవకాశముందని... అదే జరుగుతోంది ఇప్పుడు. ట్రైలర్‌ చూసినవాళ్లంతా విజువల్‌ ఎఫెక్ట్స్‌ చాలా బాగున్నాయని చెబుతున్నారు. కమల్‌కన్నన్‌, ఆయన బృందానికే ఈ క్రెడిట్‌ దక్కుతుంది. 12 దేశాల్లో విజువల్‌ ఎఫెక్ట్స్‌ పని జరుగుతోంది’’.

- రాధాకృష్ణ కుమార్‌, దర్శకుడు

‘‘హీరో ప్రభాస్‌లాగే ఈ సినిమా ఒప్పుకొన్నప్పుడు నాకు పెళ్లి కాలేదు. ఈ ప్రయాణంలోనే నాకు పెళ్లయింది. మా బాబు ఇప్పుడు స్కూల్‌కి వెళుతున్నాడు. ఈ చిత్రం కోసం నాలుగేళ్లు ప్రయాణం చేశాం. ‘రాధేశ్యామ్‌’ కథ విన్నాక రెండు రోజులకి ‘వర్షం’ సినిమాని మరోసారి చూసుకుని, బాగా ఆస్వాదించి ‘బాహుబలి’ నుంచి బయటకొచ్చి ఈ సినిమా చేశా. హాలీవుడ్‌లో స్టూడియో ఫార్మాట్‌లో తీసినట్టుగా పెట్టుబడి, రాబడితో సంబంధం లేకుండా కథ కోరుకున్నట్టుగా చేశాం. రాధాకృష్ణ కుమార్‌ దగ్గర గొప్ప ఆలోచనలున్నాయి. భారతీయ తెరపై అవి ఆవిష్కారం కాబోతున్నాయి’’.

- మనోజ్‌ పరమహంస, ఛాయాగ్రాహకుడు

‘‘ప్రపంచంలోనే కళకి ఎక్కువ విలువిస్తాయి యూరోపియన్‌ దేశాలు. అందులో ఇటలీ ఒక ప్రధాన దేశం. ఆ దేశం నేపథ్యంలో 1970లో జరిగే ప్రేమకథ ఇది, దానికి ప్రొడక్షన్‌ డిజైనర్‌గా పని చేయాలన్నప్పుడు ఇదో సవాల్‌గా అనిపించింది. ఎవ్వరూ రాజీ పడకుండా పనిచేశారు. అందరం ఒకే తరహా ఆలోచనలతో పనిచేసిన నా తొలి సినిమా ఇది. ఆ ప్రభావం జనవరి 14న తెరపై స్పష్టంగా కనిపిస్తుంది’’.

- రవీందర్‌, ప్రొడక్షన్‌ డిజైనర్‌

‘‘దీనికోసం సహజత్వంతో కూడిన సంగీతాన్ని ఇవ్వాలనుకున్నాం. అందుకోసం ఎలక్ట్రానిక్స్‌ వాయిద్యాల్ని కాకుండా సహజమైన వాయిద్యాలతో సంగీతం సమకూర్చే ప్రయత్నం చేశాం. బుడాపెస్ట్‌లో ప్రత్యేకమైన ఆర్కెస్ట్రాతో కలిసి పాటలు సమకూర్చాం’’.

- జస్టిన్‌ ప్రభాకరన్‌, సంగీత దర్శకుడు