సీఎం సొంత ఊరిలోనే మహిళలకు రక్షణ లేదు

తెదేపా జాతీయ ప్రధాన కార్యదర్శి నారా లోకేశ్‌

అమరావతి: ముఖ్యమంత్రి జగన్‌ మోహన్‌ రెడ్డి సొంత ఊరిలోనే మహిళలకు రక్షణ కొరవడిందని తెలుగుదేశం జాతీయ ప్రధాన కార్యదర్శి నారా లోకేశ్‌ విమర్శించారు. ఈ మేరకు ఆయన ట్వీట్‌ చేశారు. పులివెందుల నియోజకవర్గం పెద్దకుడాల గ్రామంలో ఎస్సీ మహిళపై అత్యాచారం, అతి కిరాతకంగా హత్య చేయటాన్ని ఆయన తీవ్రంగా ఖండించారు. విషయం బయటకి రాకుండా చేసేందుకు ప్రభుత్వం పెడుతున్న శ్రద్ధ మహిళలకు రక్షణ కల్పించే విషయంలో పెట్టాలని హితవు పలికారు. ఘటనపై త్వరితగతిన విచారణ జరిపి బాధ్యుల్ని కఠినంగా శిక్షించాలని డిమాండ్ చేశారు. రాష్ట్ర వ్యాప్తంగా మహిళలపై అఘాయిత్యాలు జరుగుతున్నా ప్రభుత్వంలో చలనం లేదని మండిపడ్డారు. చట్టాల పేరుతో కాలయాపన తప్ప మృగాళ్లను శిక్షించింది లేదన్న లోకేశ్.. రాష్ట్రంలో వరుస అత్యాచార ఘటనలు ఆందోళనకు గురిచేస్తున్నాయని అన్నారు.