Modi: ప్రధాన మంత్రి నరేంద్రమోదీ తెలంగాణ పర్యటనలో స్వల్ప మార్పు

హైదరాబాద్‌: ప్రధాన మంత్రి నరేంద్రమోదీ తెలంగాణ పర్యటనలో స్వల్ప మార్పు చోటు చేసుకుంది. ముందుగా నిర్ణయించిన షెడ్యూల్‌ ప్రకారం సెప్టెంబరు 30న కాకుండా అక్టోబరు 1న రాష్ట్రానికి రానున్నారు. మహబూబ్‌నగర్‌ జిల్లా భూత్పూర్‌లో నిర్వహించే బహిరంగ సభలో మోదీ పాల్గొననున్నారు. శాసనసభ ఎన్నికల కార్యాచరణను బహుముఖ వ్యూహంతో ముందుకు తీసుకెళ్లాలని భాజపా నిర్ణయించింది.

క్షేత్రస్థాయి కీలక కార్యాచరణకు ఈ నెలాఖరులోపు తుదిరూపు ఇచ్చి అక్టోబరులో ప్రధాని సహా అగ్రనేతల సభలు, అభ్యర్థుల ప్రకటన వంటి కీలక అంశాలతో ఎన్నికల దిశగా అడుగులేసేందుకు సిద్ధమైంది. ఇందులో భాగంగా అక్టోబరు 1న ప్రధాని నరేంద్రమోదీ మహబూబ్‌నగర్‌లో నిర్వహించనున్న బహిరంగ సభల్లో పాల్గొననున్నారు. అనంతరం అగ్రనేత, కేంద్ర హోంమంత్రి అమిత్‌షా, భాజపా జాతీయ అధ్యక్షుడు జె.పి.నడ్డాలతోనూ బహిరంగ సభలను ఏర్పాటు చేయాలని నిర్ణయించారు.