Chandrababu: కేంద్రానికి, మీకు ప్రత్యేక ధన్యవాదాలు.. ప్రధాని మోదీకి చంద్రబాబు లేఖ

హైదరాబాద్‌: ఎన్టీఆర్‌ శతజయంతి సందర్భంగా ఎన్టీఆర్‌ బొమ్మతో రూ.100ల ప్రత్యేక నాణెం విడుదల చేసే అంశంపై ధన్యవాదాలు తెలుపుతూ తెలుగుదేశం అధినేత చంద్రబాబు నాయుడు భారత ప్రధాని నరేంద్రమోదీకి లేఖ రాశారు. ప్రత్యేక నాణెం విడుదల చేయడంపై తెలుగుదేశం పొలిట్‌ బ్యూరో ధన్యవాదాలు తెలుపుతోందని లేఖలో పేర్కొన్నారు.

‘‘నాణెం విడుదల విషయంలో చొరవ తీసుకున్న కేంద్రానికి, మీకు ప్రత్యేక ధన్యవాదాలు. మంగళవారం ఎన్టీఆర్‌ భవన్‌లో జరిగిన పొలిట్‌ బ్యూరో సమావేశం మీ నిర్ణయాన్ని స్వాగతించింది. నాణేన్ని విడుదల చేయడానికి 2023 మార్చి 20న గెజిట్‌ నోటిఫికేషన్‌ విడుదల చేసినందుకు మోదీ నాయకత్వంలోని భారత ప్రభుత్వానికి ధన్యవాదాలు తెలుపుతూ పొలిట్‌ బ్యూరో తీర్మానం చేసింది. ఎన్టీఆర్‌ తెలుగు వారి ఆత్మగౌరవానికి ప్రతీక. ఎన్టీఆర్‌ని సన్మానించడమంటే తెలుగు వారిని గౌరవించడమే. ఎన్టీఆర్ 100వ జయంతిని పురస్కరించుకుని నాణెం విడుదల చేస్తున్నందుకు తెలుగు ప్రజల తరఫున, తెలుగుదేశం పార్టీ తరఫున, వ్యక్తిగతంగా నా తరఫున మీకు ధన్యవాదాలు తెలియజేస్తున్నా’’ అని లేఖలో వెల్లడించారు.