అత్యవసర పరిస్థితిని తలపిస్తున్నారు:దేవినేని

గుంటూరు: రాష్ట్రంలో పరిపాలన అత్యవసర పరిస్థితిని తలపిస్తోందని ఏపీ మాజీ మంత్రి దేవినేని ఉమా మహేశ్వరరావు ఆరోపించారు. గుంటూరు జిల్లా సత్తెనపల్లిలో తెదేపా చేపట్టిన రాస్తారోకోను పోలీసులు అడ్డుకున్నారు. ఆ పార్టీ నేతలు దేవినేని ఉమ, జీవీ ఆంజనేయులను అదుపులోకి తీసుకున్నారు. తెదేపా అధినేత చంద్రబాబును అడ్డుకుంటామని మంత్రులు చెప్పడం దారుణమని ఈ సందర్భంగా దేవినేని విమర్శించారు. గవర్నర్ బిశ్వభూషణ్‌ తక్షణమే స్పందించి మంత్రుల్ని బర్తరఫ్‌ చేయాలని డిమాండ్‌ చేశారు. 

విశాఖలో చంద్రబాబు కాన్వాయ్‌పై దాడి అంశాన్ని గవర్నర్ దృష్టికి తీసుకువెళ్తామన్నారు. ముఖ్యమంత్రి జగన్ ఉన్మాద పరిపాలనపై ప్రజలు పునరాలోచన చేయాలని కోరారు. సీఎం జగన్‌ డమ్మీ కాన్వాయ్ వేసుకుని తిరుగుతున్నారని ఎద్దేవా చేశారు. వైకాపాపై ప్రజావ్యతిరేకత స్పష్టంగా కనిపిస్తోందని, ఈ ప్రభుత్వం కొట్టుకుపోవడం ఖాయమన్నారు. వైకాపా ప్రభుత్వ అరాచకాలను కేంద్రం దృష్టికి తీసుకువెళ్తామని, కేంద్రం కూడా రాష్ట్ర ప్రభుత్వ దుర్మార్గాలను ప్రశ్నించాలని కోరారు.