భారాసకు మాజీ ఎమ్మెల్యే వేనేపల్లి చందర్‌రావు రాజీనామా

అనుచరులతో కలిసి కాంగ్రెస్‌లో చేరుతున్నట్లు ప్రకటన

కోదాడ, న్యూస్‌టుడే: భారాస సీనియర్‌ నేత, నాలుగుసార్లు ఎమ్మెల్యేగా పనిచేసిన వేనేపల్లి చందర్‌రావు పార్టీని వీడారు. సూర్యాపేట జిల్లా కోదాడలోని తన నివాసంలో అనుచరులతో కలిసి శనివారం ఏర్పాటు చేసిన సమావేశంలో ఆయన ఈ విషయాన్ని వెల్లడించారు. కోదాడలో ఎమ్మెల్యే అవినీతి, సొంత పార్టీ నాయకులపైనే కేసులు నమోదు చేయడం, ప్రతి పనిలో కమీషన్లు తీసుకోవడం.. ఇలా అనేక అంశాలతో పార్టీ ప్రభావం తగ్గుతోందని ఆరోపించారు. ఎమ్మెల్యేకు మళ్లీ టికెట్‌ ఇవ్వొద్దని పార్టీ అధిష్ఠానం దృష్టికి తీసుకెళ్లినా ఉపయోగం లేకపోవడంతో.. పార్టీకి రాజీనామా చేసి కాంగ్రెస్‌లో చేరుతున్నట్లు ప్రకటించారు. ఈ సమావేశంలో భారాస రాష్ట్ర కార్యదర్శి వెంకటరత్నం ఎర్నేని, అనంతగిరి జడ్పీటీసీ సభ్యురాలు కొణతం ఉమ, డీసీసీబీ మాజీ ఛైర్మన్‌ ముత్తవరపు పాండురంగారావు, అనంతగిరి, మోతె ఎంపీపీలు వెంకటేశ్వర్లు, ఆశా; నడిగూడెం జడ్పీటీసీ సభ్యురాలు కవిత, మార్కెట్‌ కమిటీ మాజీ ఛైర్మన్‌ మహబూబ్‌జానీ తదితరులు పాల్గొన్నారు.