TDP-Janasena-BJP: సీట్ల సర్దుబాటుపై నేడూ చర్చ!

అమిత్‌షా, నడ్డాలతో చంద్రబాబు, పవన్‌ భేటీ
అర్ధరాత్రి వరకు కొనసాగిన సమాలోచనలు
7 ఎంపీ, 10 అసెంబ్లీ స్థానాలు అడుగుతున్న భాజపా!
సీట్ల కేటాయింపుపై రాని స్పష్టత
ఎన్డీయేలో తెదేపా చేరిక ఖాయమైనట్లే!

ఈనాడు, దిల్లీ: ఆంధ్రప్రదేశ్‌లో ఎన్నికల పొత్తుపై భాజపా అగ్రనేతలు అమిత్‌ షా, జేపీ నడ్డా గురువారం రాత్రి తెదేపా అధ్యక్షుడు చంద్రబాబునాయుడు, జనసేన అధ్యక్షుడు పవన్‌ కల్యాణ్‌లతో చర్చలు జరిపారు. వచ్చే సార్వత్రిక ఎన్నికల్లో ఎన్డీయే కూటమి 400కి పైగా సీట్లు సాధించాలని లక్ష్యంగా పెట్టుకున్న ప్రధానమంత్రి నరేంద్ర మోదీ పాత మిత్రపక్షాలన్నింటినీ తిరిగి దగ్గర చేర్చుకొనే ప్రయత్నం చేస్తున్నారు. దీనిలో భాగంగా తెదేపాను తిరిగి ఎన్డీయేలో చేర్చుకొనే అంశంపై కసరత్తు జరిగినట్లు తెలుస్తోంది. ఇప్పటికే బిహార్‌లో నీతీష్‌కుమార్‌, ఉత్తర్‌ప్రదేశ్‌లో ఆర్‌ఎల్‌డీ నేత జయంత్‌చౌధరిని ఎన్డీయేలో చేర్చుకున్న భాజపా అగ్రనేతలు రేపోమాపో ఒడిశా ముఖ్యమంత్రి నవీన్‌ పట్నాయక్‌ నేతృత్వంలోని బీజేడీనీ చేర్చుకోవడానికి రంగం సిద్ధం చేశారు. అదే క్రమంలో తెదేపాతో జట్టు కట్టడానికీ సమాయత్తమయ్యారు. ఇందులో భాగంగానే ఆంధ్రప్రదేశ్‌లో సీట్ల సర్దుబాటుపై అమిత్‌షా, నడ్డాలు గురువారం రాత్రి చంద్రబాబు, పవన్‌కల్యాణ్‌లతో చర్చించినట్లు సమాచారం. గురువారం రాత్రి 10.30 నుంచి 12.10 వరకు వీరి చర్చలు కొనసాగాయి.

మరోవైపు.. రాష్ట్రంలోని 25 లోక్‌సభ, 175 అసెంబ్లీ స్థానాల్లో మిత్రపక్షమైన జనసేనకు 3 లోక్‌సభ, 24 అసెంబ్లీ స్థానాలు ఇవ్వడానికి తెలుగుదేశం పార్టీ అంగీకరించడం, ఇప్పటికే తొలి జాబితా విడుదల చేయడం కూడా పూర్తయింది. మిగిలిన స్థానాలకూ అభ్యర్థులను ఎంపిక చేయాల్సి ఉన్నందున అందులో భాజపాకు కేటాయించే సీట్ల అంశంపైనే ప్రస్తుతం కసరత్తు జరిగింది. భాజపాకు 4 ఎంపీ సీట్లు, 6 వరకు ఎమ్మెల్యే సీట్లు ఇవ్వాలని తెదేపా యోచిస్తున్నట్లు సమాచారం. ఇంతకు మించి ఇస్తే కూటమికి నష్టం జరుగుతుందన్న యోచనలో చంద్రబాబు ఉన్నట్లు తెదేపా నాయకులు చెబుతున్నారు. ఈ నేపథ్యంలో కేవలం సీట్ల సర్దుబాటుపైనే అధినాయకులు సమాలోచనలు చేసినట్లు తెలుస్తోంది. శుక్రవారం మరో దఫా సమావేశం కానున్నారని పార్టీ వర్గాలు తెలిపాయి. మొత్తానికి ఎన్‌డీయేలో తెదేపా చేరిక ఖరారైనట్లే కనిపిస్తోంది.

నెల రోజుల తర్వాత..

గత నెల 7న అమిత్‌షా, జేపీ నడ్డాలతో చంద్రబాబు ఓ దఫా చర్చలు జరిపారు. తాజాగా మరోమారు చర్చల కోసం ఆయన హైదరాబాద్‌ నుంచి గురువారం సాయంత్రం దిల్లీ చేరుకున్నారు. జనసేన అధ్యక్షుడు పవన్‌ కల్యాణ్‌ విజయవాడ నుంచి రాత్రి వచ్చారు. తర్వాత ఇద్దరూ కలిసి అమిత్‌షా నివాసానికి చేరుకొని చర్చల్లో పాల్గొన్నారు. 2014 ఎన్నికల్లో భాజపాకు తెదేపా 4 ఎంపీ, 13 అసెంబ్లీ స్థానాలు కేటాయించింది. ఇప్పుడు ఆ పార్టీ 7 లోక్‌సభ, 10 అసెంబ్లీ స్థానాలు కోరుతున్నట్లు వార్తలు వస్తున్నాయి. ప్రస్తుతం కూటమిలో జనసేన కూడా ఉండటం, ఇప్పటికే ఆ పార్టీకి 3 లోక్‌సభ, 24 అసెంబ్లీ స్థానాలు కేటాయించినందున భాజపాకు అడిగినన్ని సీట్లు సర్దుబాటు చేయడం సాధ్యం కాదన్న వాదన తెదేపా వైపు నుంచి వినిపిస్తోంది. మొత్తంగా బీజేపీ, జనసేనలకు కలిపి 7 లోక్‌సభ, 30 అసెంబ్లీ స్థానాలు కేటాయించాలని చంద్రబాబు యోచిస్తున్నారని, చర్చల అనంతరం ఈ సంఖ్యలో కొంత అటూ ఇటూ మార్పు ఉండొచ్చని అంటున్నారు. అయితే ఈ అంశంపై భాజపా అగ్రనేతలే చర్చలు జరుపుతున్నందున ఆ పార్టీలోని రాష్ట్ర స్థాయి నాయకులెవరూ స్పందించడంలేదు. ఎంపీ రామ్మోహన్‌నాయుడు, మాజీ ఎంపీ కంభంపాటి రామ్మోహనరావులతో కలిసి దిల్లీ వచ్చిన చంద్రబాబును ఎంపీలు వేమిరెడ్డి ప్రభాకర్‌రెడ్డి, లావు శ్రీకృష్ణదేవరాయలు, రఘురామకృష్ణరాజు కలిసి మాట్లాడారు.