అమేఠీ ప్రజలు నన్ను కోరుకుంటున్నారు: రాబర్ట్‌ వాద్రా

మథుర: అమేఠీ ప్రజలు తన ప్రాతినిధ్యాన్ని కోరుకుంటున్నారని, ఇక్కడ తన అభ్యర్థిత్వంపై సరైన సమయంలో పార్టీ నిర్ణయం తీసుకుంటుందని కాంగ్రెస్‌ ప్రధాన కార్యదర్శి ప్రియాంకా గాంధీ భర్త రాబర్ట్‌ వాద్రా పేర్కొన్నారు. తాను రాజకీయాల్లో చేరాలని అనుకుంటున్నానని, దేశంలో మార్పు సంకేతాలు కనిపిస్తున్నాయని తెలిపారు. ఉత్తర్‌ప్రదేశ్‌లోని బృందావన్‌లో ఉన్న బాంకే బిహారీ స్వామిని వాద్రా సోమవారం దర్శించుకున్నారు. అనంతరం మీడియాతో మాట్లాడారు. తాను రాజకీయాల్లో క్రియాశీలంగా ఉన్నా లేకపోయినా దేశం, ప్రజల కోసం పని చేస్తానని చెప్పారు.   అమేఠీలో తాను అభ్యర్థి అవ్వాలా లేదా అనే అంశంపై దేశంలోని ప్రతి మూలనా చర్చ జరుగుతోందని, ఇది ప్రజల కోరికని తెలిపారు. ప్రజలకు ప్రాతినిధ్యం వహించాలనుకుంటే ఆ ప్రాంతానికి వెళ్లి ప్రజల సమస్యలను వినాలని, తనకూ రాజకీయాల్లో చేరాలని ఉందని, సరైన సమయంలో నిర్ణయం ఉంటుందని, అంత తొందరేమీ లేదని స్పష్టం చేశారు.