BJP: పెద్దన్న అనగానే కాంగ్రెస్‌.. భాజపా ఒక్కటయినట్లా?: కిషన్‌రెడ్డి

హైదరాబాద్‌: తెలంగాణలో ప్రధానమంత్రి నరేంద్రమోదీ సభలు విజయవంతమయ్యాయని కేంద్రమంత్రి, భాజపా తెలంగాణ అధ్యక్షుడు కిషన్‌రెడ్డి తెలిపారు. రాష్ట్ర పార్టీ కార్యాలయంలో ఆయన మీడియాతో మాట్లాడారు. ప్రధాని మోదీని సీఎం రేవంత్‌ పెద్దన్న అని ఎందుకు అన్నారో ఆయన్నే అడగాలన్నారు. పెద్దన్న అన్నంత మాత్రాన కాంగ్రెస్‌, భాజపా ఒక్కటి అయినట్లా? అని ప్రశ్నించారు. ఆరు గ్యారంటీల అమలుకు కాంగ్రెస్‌ ప్రభుత్వం వద్ద క్లారిటీ లేదని, అవి కాగితాలకే పరిమితమయ్యాయని విమర్శించారు. రూ.2లక్షల రుణమాఫీ, 4వేల పింఛనుపై  ప్రభుత్వం సమాధానం చెప్పాలని డిమాండ్‌ చేశారు. ప్రజలతో కలిసి ప్రభుత్వాన్ని ప్రశ్నించే కార్యక్రమాలు చేపడతామని తెలిపారు. భాజపా మేనిఫెస్టో కోసం బుధవారం నుంచి సలహాలు స్వీకరిస్తామని చెప్పారు. అనంతరం పార్లమెంట్‌ ఎన్నికల ఎల్‌ఈడీ ప్రచార రథాలను కిషన్‌రెడ్డి ప్రారంభించారు.