MK Stalin: ఖుష్బూపై అనుచిత వ్యాఖ్యలు.. డీఎంకే నేతపై సీఎం స్టాలిన్‌ వేటు

చెన్నై: తమిళనాడు గవర్నర్‌ ఆర్‌.ఎన్‌.రవి, భాజపా నాయకురాలు ఖుష్బూపై అనుచిత వ్యాఖ్యలు చేసిన డీఎంకే పార్టీ నేత శివాజీ కృష్ణమూర్తిపై ఆ పార్టీ అధిష్ఠానం కఠిన చర్యలు తీసుకుంది. పార్టీ నుంచి ఆయన్ను బహిష్కరిస్తూ సీఎం స్టాలిన్‌ నిర్ణయం తీసుకున్నారు. జనవరి నెలలోనూ శివాజీ తమిళనాడు గవర్నర్‌ను ఉద్దేశించి వివాదాస్పద వ్యాఖ్యలు చేసిన సంగతి తెలిసిందే. దీంతో అతడిని పార్టీ నుంచి సస్పెండ్ చేస్తున్నట్లు అప్పట్లో డీఎంకే ప్రకటించింది. అయినప్పటికీ, ఆయన ప్రవర్తనలో మార్పు రాకపోవడంతో తాజాగా డీఎంకే అధ్యక్షుడు స్టాలిన్‌ అతడిని పార్టీ నుంచి బహిష్కరిస్తున్నట్టు ప్రకటించారు.

ఇటీవల నిర్వహించిన ఓ సమావేశంలో ఖుష్బూను ఉద్దేశిస్తూ శివాజీ కృష్ణమూర్తి అనుచిత వ్యాఖ్యలు చేయడం దుమారం రేగింది. ఈ వీడియోను ఆమె ట్విటర్‌లో పోస్టు చేస్తూ.. సీఎం స్టాలిన్‌ను ట్యాగ్‌ చేశారు. శివాజీ తన పట్ల చేసిన వ్యాఖ్యలు సిగ్గుచేటని పేర్కొన్నారు. అవే కామెంట్స్‌ను మీ కుటుంబంలోని మహిళలకు అంటే మీరు ఊరుకుంటారా? అంటూ ఆమె ఆవేదన వ్యక్తం చేశారు. ‘‘మీకు అర్థం కానిది ఏంటంటే.. ఆయన కేవలం నన్నే కించపరచడం లేదు. మిమ్మల్ని, మీ తండ్రిగారి లాంటి గొప్ప నేతల్ని సైతం అవమానపరుస్తున్నారు. మీరు ఆయనకు ఎంత ఎక్కువ చనువు ఇస్తే.. మీరు రాజకీయంగా అంత వెనకబడిపోతారు. మీ పార్టీ అనైతిక వ్యక్తులకు స్వర్గధామంలా మారుతోంది. ఇది సిగ్గు చేటు’’ అంటూ ఖుష్బూ ట్వీట్‌ చేశారు. శివాజీ కృష్ణమూర్తి చేసిన తప్పే మళ్లీ మళ్లీ చేస్తున్నారని భాజపా రాష్ట్ర అధ్యక్షుడు అన్నామలై అన్నారు. అతడిపై చర్యలు తీసుకోవాలని డిమాండ్‌ చేశారు.