Paritala Sunitha: మరూరు టోల్ గేట్‌ వద్ద జాతీయ రహదారిపై పరిటాల సునీత బైఠాయింపు

చెన్నెకొత్తపల్లి: పుంగనూరులో తెదేపా శ్రేణులపై రాళ్లదాడిని నిరసిస్తూ ఉమ్మడి అనంతపురం జిల్లాల్లో తెదేపా నాయకులు శాంతియుత నిరసనలకు పిలుపునిచ్చారు. ఈనేపథ్యంలో జిల్లా వ్యాప్తంగా తెదేపా నాయకులపై పోలీసులు ఆంక్షలు విధించారు. నిరసనలు తెలపటానికి అనుమతి లేదంటూ ఎక్కడికక్కడ గృహ నిర్బంధాలు చేశారు. 

మాజీ మంత్రి పరిటాల సునీత చెన్నెకొత్తపల్లిలో నిరసన తెలపటానికి వెళ్తుండగా 44వ జాతీయ రహదారిపై మరూరు టోల్ గేట్‌ వద్ద పోలీసులు అడ్డుకున్నారు. తాము శాంతియుతంగా నిరసనలు తెలపటానికి వెళ్తున్నామని సునీత చెప్పినా.. పోలీసులు వినకపోవటంతో ఆమె జాతీయ రహదారిపై కార్యకర్తలతో కలిసి బైఠాయించి నిరసన తెలిపారు. పోలీసుల తీరుపై మండిపడ్డారు. 

మరోవైపు హిందూపురంలో తెదేపా పట్టణ అధ్యక్షుడు రమేశ్‌తో పాటు పలువురు తెదేపా నేతలను పోలీసులు గృహ నిర్బంధం చేశారు. నిరసనలకు అనుమతించొద్దని.. పైఅధికారుల నుంచి తమకు ఆదేశాలు వచ్చినట్లు పోలీసులు చెబుతున్నారని తెదేపా నేతలు ఆరోపించారు. ఈక్రమంలోనే పోలీసులు తమను అడ్డుకుంటున్నట్లు వెల్లడించారు.