Pawan Kalyan: పాపం పసివాడు ‘క్లాస్‌వార్‌’ గురించి తెలుసుకోవాలి: పవన్‌

అమరావతి: ముఖ్యమంత్రి జగన్‌ విపక్షాలను ఉద్దేశించి చేసిన ‘క్లాస్‌ వార్‌’ వ్యాఖ్యలపై జనసేన అధినేత పవన్‌ కల్యాణ్‌ ట్విటర్‌ వేదికగా వ్యంగ్యాస్త్రాల పర్వం కొనసాగించారు.  పాపం పసివాడు పేరుతో బుధవారం ఓ కార్టూన్‌ పోస్టు చేసిన పవన్‌.. ఇవాళ కథాకళి పేరుతో ఓ వీడియోను ట్వీట్‌ చేశారు. అందులో సీఎం జగన్‌ క్లాస్‌ వార్‌ గురించి చేసిన వ్యాఖ్యలు.. వాటికి స్పందనగా జనసేన ప్రధాన కార్యదర్శి నాగబాబు, అధికార ప్రతినిధి వేములపాటి అజయ్‌కుమార్‌ మధ్య జరిగిన చర్చకు సంబంధించిన వీడియోను పోస్టు చేశారు. ఆరు చోట్ల ప్యాలెస్‌లు నిర్మించుకున్న జగన్‌.. పేదల పక్షపాతిని అంటూ మాట్లాడటం విడ్డూరంగా ఉందని నాగబాబు, అజయ్‌కుమార్‌ అభిప్రాయపడ్డారు. బహుశా జగన్‌ క్యాష్ వార్‌ గురించి మాట్లాడి ఉంటారని వ్యంగ్యాస్త్రాలు సంధించారు. ఆ ట్వీట్‌ వీడియోకు.. పాపం పసివాడు క్లాస్‌వార్‌ గురించి తెలుసుకోవాలన్న వ్యాఖ్యను పవన్‌ జోడించారు.