Andhra News: కొనసాగుతున్న బుజ్జగింపులు.. కాసేపట్లో సీఎం వద్దకు బాలినేని

విజయవాడ: వైకాపా సీనియర్‌ నేత, మాజీ మంత్రి బాలినేని శ్రీనివాస్‌రెడ్డికి బుజ్జగింపుల పర్వం కొనసాగుతూనే ఉంది. కొత్త మంత్రుల జాబితాలో తన పేరు కొనసాగించకపోవడంతో బాలినేని అసంతృప్తిగా ఉన్న విషయం తెలిసిందే. ఈ నేపథ్యంలో ఆయన ఎమ్మెల్యే పదవికి రాజీనామా చేస్తారనే వార్తలొచ్చాయి. ఈ నేపథ్యంలో విజయవాడలోని బాలినేని నివాసానికి ప్రభుత్వ సలహాదారు సజ్జల రామకృష్ణారెడ్డి, శ్రీకాంత్‌రెడ్డి, అప్పిరెడ్డిలు వచ్చారు. బాలినేనితో ఈ ముగ్గురు భేటీ అయ్యారు. నిన్న సాయంత్రం కొత్త మంత్రుల పేర్లు బహిర్గతం అయినప్పటి నుంచి సజ్జల రామకృష్ణారెడ్డి బాలినేనితో సమావేశం కావడం ఇదో మూడోసారి. నిన్న మధ్యాహ్నం ఒకసారి, రాత్రి శ్రీకాంత్‌రెడ్డితో కలిసి మరోసారి సజ్జల.. బాలినేనితో భేటీ అయిన విషయం తెలిసిందే. అయినా బాలినేని వైఖరిలో మార్పు రాలేదని సమాచారం. ఈ క్రమంలో మరోసారి భేటీ అవడం ప్రాధాన్యం సంతరించుకుంది.

కాగా, సీఎం జగన్ స్వయంగా బాలినేని శ్రీనివాస్‌ రెడ్డితో మాట్లాడాలని నిర్ణయం తీసుకున్నట్లు తెలుస్తోంది. బాలినేనిని తన వద్దకు తీసుకురావాల్సిందిగా సజ్జలను సీఎం ఆదేశించినట్లు సమాచారం. కాసేపట్లో సజ్జల రామకృష్ణారెడ్డి, శ్రీకాంత్‌రెడ్డి కలిసి బాలినేనిని సీఎం వద్దకు తీసుకెళ్లనున్నట్లు సమాచారం.